سپورټ کرکټ وزش او تمرین

بُست د ګلبدین نایب په لوبډلمشرۍ کې خپله لومړۍ لوبه وګټله

لیکنه: محمدصابر حمیدي

د افغانستان شپږیزه کرکټ لیګ پرون یکشبنه پيل شو، چې تر لومړۍ او دویمې لوبې وروسته یې نن دوشنبه ماپښین درېیمه لوبه د بُست او کابل بازانو لوبډلو ترمنځ ترسره شوه.

یاده لوبه بُست ساتونکو د کابل بازان کرکټ لوبډلې څخه د ۵۷ منډو په توپير وګټله، د افغان کرکټ بورډ په وینا، چې تر ډېره د بُست ساتونکو د لوبډلمشر ګلبدین نایب غوره توپ اچونه د یادي بریا لامل شوه.

د شپږیزه لیګ د درېیمې لوبې حال

د یادې لوبې پچه د بُست کرکټ لوبډلې لوبډلمشر ګلبدین نایب د کابل بازان د لوبډلمشر رحمن‌الله ګربز څخه وګټله، چې لومړی یې د توپوهنې پرېکړه وکړه.

بُست لوبډلې په ټاکلو شل اورونو کې د دریو لوبغاړو په سوځېدو سره ۱۷۲ منډې جوړې کړې او کابل بازان ته یې د ۱۷۳ منډو هدف وټاکی.

منیرکاکړ ۴۱ ناسوځېدلي، عمران جنت ۴۳ او احسان الله جنت بیا ۲۹ منډې بُست ساتونکو ته وکړې.

کابل بازان ته بیا فرمان الله، ضیا‌ءالرحمن او ننګیالي یوه ـ یوه ویکټه واخیستله.

کله چې کابل بازان لوبډله د توپوهنې لپاره میدان ته کښته شوه، نو د لوبې په ۱۹،۱ اورونو کې یې د ټولو لوبغاړو په سوځېدو سره ۱۱۵ منډې وکړې او په دې سره یې د ۵۷ منډو په توپير د بُست لوبډلې څخه ماته وخوړه.

کابل بازان ته صدیق‌الله اتل ۳۲، عظمت‌الله عمرزي ۲۸ او ضیا‌ءالرحمن ۱۷ منډې وکړې.

د بُست لپاره بیا سید شېرزاد او ګلبدین نایب درې ـ درې، کریم جنت دوې او امیرحمزه هوتک بیا یوه ویکټه واخیستله.

ننۍ لوبه کې جایزه ورکوونکي لوبغاړي

د یادي لوبې غوره لوبغاړی سید شېرزاد وټاکل شو، چې د خپلې لوبډلې لپاره يې درې ویکټې واخیستلې.

ګلبدین نایب ته د لوبې د سټایلش لوبغاړي جایزه ورکړل شوه.

عمران جنت بیا د ډېرو شپږیزو وهلو جایزه ترلاسه کړه.

په شپږیزه لیګ کې د سبا سې شنبې لوبې

د شپږیزه کرکټ لیګ په درېیمه ورځ سبا سې شنبه هم دوې سیالۍ ترسره کیږي، چې په ترڅ کې یې سهار ۹:۳۰ بجې میس عینک د کابلا‌بازانو په وړاندې او ماپښين ۲ بجې بیا بند امیر د بُست لوبدلې په وړاندې د سیالي ډګر ته کښته کیږي.

د لیکوال/ لیکوالې په اړه

محمد صابر حمیدي ، کندهار

محمد صابر حمیدي په کندهار کې د یاران د کاري ټیم غړی دی. نوموړی پر دې سربیره د کندهار پوهنتون د ښووني او روزنې پوهنځی د پښتو څانګې د څلورم کال محصل دی او د ” زما“ راډیو خبري برخه کې کار کوي. صابر د فوټبال لوبغاړی دی. یاران ته په سپورټي، ټولنیزو او نورو برخو کې لیکنې او مطالب چمتو کوي. په یاران کې د نوموړي د ټولو لیکنو د بیا خپرولو حق له یاران سره خوندي دی.

تبصره مو ولیکئ