افغانستان بریا او پرمختګ سپورټ کرکټ

د ځنو ملي لوبغاړو په شتون کي سبا د بُست غوره لیګ پایلوبه کیږي

خبریال: فضل الله فضلي

په کندهار کي د کرکیټ لوبو د بُست شل اوریز غوره لیګ جریان لري او سبا (چهارشنبه) یې پایلوبه ترسره کیږي.

د بُست غوره لیګ تېره دوشنبه د پنځو لوبډلو په شمول پیل سو او سبا یې نهمه ورځ ده او پای ته رسیږي.

پدې لیګ حیات د میوند اتلان، الفرهاد ابراشیم کاروان، ناصر افغان بالاحصار زلمیان، نعمت الله اختیارالدین قلعه ستوري او د یاسین خان بُست ساتونکي لوبډلي ولوبېدلې.

ددې لیګ له ګروپي لوبو وروسته په نیمه پایلوبو کي د اختیارالدین قلعه ستورو او د میونداتلانو لوبډلي وتوانېدلې چي پایلوبي ته لاره پیدا کړي.

سبا سهار ۹ بجې د دواړو لوبډلو ترمنځ پایلوبه د کندهار کرکیټ بورډ اړوند په عمومي لوبغالي کي ترسره کیږي.

د بُست غوره لیګ په لومړي ځل په بُست کرکیټ زون کي ترسره کيږي، چي د هیواد د ملي لوبډلو یو شمېر لوبغاړو هم پکښي برخه واخیستل.

د ملي لوبډلي لوبغاړی رحمن الله ګربز د بالاحصار زلمیانو سره په نیمه پایلوبو کي ولوبېدئ، چي په یوه لوبه کي یې په ۱۳ توپونو چټکه نیمه سلیزه ووهل او د لوبي غوره لوبغاړی هم اعلان سو.

د ۱۹ کلني لوبډلي او تېر شپږیزه لیګ ځوان لوبغاړی عضمت الله عمرزی هم د بالاحصار زلمیانو لوبډلي سره ملګری وو، چي ښې لوبي یې وکړې.

بل ملي لوبغاړی شراف الدین اشرف او د ۱۹ کلنو لوبډلي عبدالرحمن وو، چي د الفرهاد ابراشیم کاروان لوبډلي لپاره یې نیمه پایلوبي ترسره کړې.

په سبا لوبه کي د بُست زون او ملي لوبډلي لوبغاړی منیرکاکړ د اختیارالدین قلعه ستورو لپاره لوبډلمشري ترسره کوي.

دا لیګ چي سوداګریزه بڼه یې خپله کړې، ګڼ شمېر مینوال او تماشاچیان هم لري او لوبي په لوبغالي کي ننداره کوي.

ددې ترڅڼګ ددې لیګ ټولي لوبډلو هم ملالي ملاتړ ترلاسه کړئ دئ.

ددې لیګ مسؤلین وايي چي ددې لیګ لپاره یې لا له وړاندي بولۍ ترسره کړې وه او هري لوبډلي په ۵ کټګوریو کي لوبغاړي اخیستي.

دا په هیواد کي دننه له شپږیزه لیګ وروسته دوهم ستر لیګ دئ، چي په کندهار کي ترسره کیږي او د کندهار کرکیټران دا د کندهار لپاره یو ستره لاسته راوړنه بولي.

د لیکوال/ لیکوالې په اړه

فضل الله فضلي

په کندهار کي د یاران ویب پاڼي لیکوال او ژورنالیست.
زده کړي: کندهار پوهنتون د ژورنالیزم او عامه اړیکو پوهنځی محصل
رسنیزه دنده: ۹ کاله
نوري دندي: هیواد راډیو تلوېزیون او افغانستان ورزشي خبریالان فدراسیون کي ورزشي خبریال، د یو خصوصي انستیتوت د عامه اړیکو مدیر، د سولي ږغ ټولني ولایتي غړی او کندهار پوهنتون پاچاخان علمي څېړنيز مرکز د سولي کلب غړی.

تبصره مو ولیکئ