د باميانو هزاره ځوانانو په پاکستان غږ وکړ چې د پښتنو او بلوڅو وژل دې بس کړي

راپور: محمد عزيز پردېس
د باميان ولايت په سلهاو اوسېدونکو او مدني فعالينو د يو اعتراضيه حرکت په ترڅ کې په پاکستان کې د پښتنو او بلوڅو د مدني او سوله ييزو حرکتونو څخه ملاتړ اعلان کړ.

ياد کسان نن د سلواغې په پنځمه ويشتمه د باميانو د ويجاړشويو بتانو مخکې چې مختلف شعارونو يې له ځانونو سره لېږدول، په يوه غږ يې ويل چې پاکستان دې د پښتنو او بلوڅو له ځورونې څخه لاس واخلي.
د اعتراضيه غونډې ګډونوالو ټولنيزو رسنيو ته په خبرو کې ويلي دي: که څه هم موږ د هزاره ټبر څخه يوو، خو دا چې د يو شمېر کسانو انساني او اسلامي حقونه تر پښو لاندې کېږي؛ نو د پاکستان د حکومت پر وړاندې درېږو او د پښتنو او بلوڅانو څخه ملاتړ کوو.

دا اعتراضيه غونډه په داسې وخت کې ترسره کېږي، چې څو ورځې وړاندې د پښتون ژغورنې غورځنګ مخکښ او د پښتنو حقونو مدافع ارمان لوڼی د پاکستان پوځ لخوا لومړی ونيول شو او بيا ووژل شو.
وروسته د ارمان لوڼي د وژنې څخه د پاکستان او افغانستان په شمول د نړۍ په ګوټ ګوټ کې اعتراضيه غونډې وشوې او د دې غونډو لړۍ لا هم روانه ده.

د ټولنيزو رسنيو د فعالينو د راپورونو له مخې له يوې اونۍ راهيسې شاوخوا ۱۰۰ تنه د پښتون ژغورنې غورځنګ غړي د پاکستان د پوځ له لوري په مختلفو بهانو نيول شوي دي چې د پاکستان په زندانو کې د تورو تمبو شاته شپې او ورځې سبا کوي.

وروستي مطالب