پوهنه ټولنیز ژوند ځوانان او زده کړې ژوند بڼه کلتور او هنر

د ترکیې په استانبول کې د ایوب سلطان مسجد

ژباړه: حمیدالله حمیدي

د ایوب سلطان مسجد، لومړنی مسجد دی، چې په ترکیه کې د استانبول له فتحې وروسته په دغه ښار کې جوړ شوی دی.

دغه مسجد په ۱۴۵۸ مېلادي کال کې د عثماني ترکانو لخوا د استانبول د ایوب په سیمه کې، چې د طلایي شاخ له خلیج سره نېږدې موقعیت لري جوړ شوی دی.

د ۱۸مې پېړۍ په وروستیو کې د سختې زلزلې له کبله د مسجد ډېری برخې ونړېدې او ورانې شوې. له همدې کبله په۱۸۰۰ مېلادي کال کې له منارو پرته دغه مسجد یو ځل بیا له سره ورغول شو. د ایوب انصاري مقبره هم چې د حضرت محمد (ص) صحابي دی، د همدې مسجد په څنډه کې موقعیت لري او مسلمانا یې زیارت کوي.

ویډیو؛

https://youtu.be/TKVUCvlhu94

پر لمونځ کوونکو سر بېره هر کال په زرګونه مسلمانان د نړۍ له بېلابېلو هېوادونو څخه د دې مسجد لیدو ته ورځي او لمونځونه په کې ادا کوي.

دغه مسجد ټول ټال څلور منارې، یوه لویه او څلور کوچنۍ ګنبدې لري.

مسجد شاوخوا پارک لري، چې د خرما پر ونو او نورو زینتي بوټو ښایسته شوی دی.

یاد مسجد د نړۍ په لویو، مشهورو او ښایسته مسجدونو کې راځي. ددغه مسجد د شاوخوا سړکونو او جادو د جوړېدو تاریخ هم د عثمانیانو دورې ته ورګرځي.

دغه راز د ایوب سلطان د مسجد په څنګ کې چې کوم پلورنځي دي د عثمانیانو د دورې جامې او وسایل چې اوس نوي خو په هماغه سبک جوړېږي پکې پلورل کېږي.

د لیکوال/ لیکوالې په اړه

حمیدالله حمیدي

حمیدالله حمیدي په 1388 کال کې په کابل کې د افغانستان تخنیکي او مسلکي زدکړو په انستیتیوت (ATVI) کې د کمپیوټر ساینس ډېپارټمنټ څخه فارغ شوی. له ۲۰۱۱ م کال راهېسې سپوږمۍ راډیو سره دنده پیل کړې.
له سپوږمۍ راډیو سره د کار کولو پر مهال یې د پښتو ادبیاتو د شپې پوهنځی لوستی او په ۱۳۹۶ کال کې د کابل د ښوونې او روزنې پوهنتون د پښتو ادبیاتو له څانګې فارغ شوی. حمیدي پر سپوږمۍ راډیو سربیره له نورو رسنیو سره هم همکاري کوي. په دې لړ کې له څه مودې راهېسې د یاران لپاره هم لیکنې چمتو کوي. په یاران کې د ښاغلي حمیدي د خپرو شویو لیکنو د بیا خپراوي حق د یاران له ادارې سره خوندي دی.

تبصره مو ولیکئ