سپورټ کرکټ

دې ته اوپنینګ واي!؛ آسټرالیا په ۱۰ ویکیټو هند ته سخته ماته ورکړه

د هندوستان او آسټرالیا کرکیټ ملي لوبډلو ترمنځ د هند په کوربتوب د درو یو ورځنیو لوبو د لړۍ لومړۍ لوبه نن سې شنبه ترسره سوه، چي پکښي آسټرالیا په لسو ویکیټو کوربه هندوستان ته ماته ورکړه.

په یاده لوبه کي لومړی هند توپوهنه وکړه، هند د لوبي په ۴۹،۱ آورونو کي د ټولو لوبغاړو په سوځېدو سره آسټرالیا ته د ۲۵۶ منډو هدف وټاکه.

د هند لپاره شکر داوان ۷۴، کیل راهول ۴۷، پنټ ۲۸، جدیجا ۲۵، کیدر جادوا ۱۷ او ویراټ کوهلي بیا ۱۶ منډي جوړي کړې.

د هند درې لوبغاړي میچل سټارک، دوه ـ دوه لوبغاړي پټ کومینز او کین ریچارډسن، خو آدم زیمپا او اشټون اګر بیا د هند یوه ـ یوه ویکیټ واخیستله.

کله چي د آسټرالیا لوبغاړي د هدف پوره کولو لپاره میدان ته کښته سول، د هند له لوري ورکړل سوی هدف ئې د لوبي په ۳۷،۴ آورونو کي د هیڅ لوبغاړي په نه سوځېدو سره پوره کړ او په دې سره ئې په لومړۍ یو ورځنۍ لوبه کي په لسو ویکیټو هند ته ماته ورکړه.

د آسټرالیا لپاره د اوپنینګ تکړه لوبغاړو ډيویډ وارنر او ایرون فینچ په یوازي سر یاد هدف پوره کړ.

په یاده لوبه کي ډيویډ وارنر ۱۲۸ ناسوځېدلي او ایرون فینچ بیا ۱۱۰ ناسوځېدلي منډي جوړي کړې.

هند او آسټرالیا کرکیټ ملي لوبډلي د لړۍ دوهمه یو ورځنۍ لوبه راتلونکې جمعه او درېیمه یو ورځنۍ لوبه بیا راتلونکې یکشنبه ترسره کوي.

د لیکوال/ لیکوالې په اړه

محمد صابر حمیدي ، کندهار

محمد صابر حمیدي په کندهار کې د یاران د کاري ټیم غړی دی. نوموړی د کندهار پوهنتون د ښووني او روزنې پوهنځی د پښتو څانګې څخه فارغ شوی. په کندهار کې د ” زما“ راډیو سره په خبري برخه کې کار کوي. صابر د فوټبال لوبغاړی دی. یاران ته په سپورټي، ټولنیزو او نورو برخو کې لیکنې او مطالب چمتو کوي. په یاران کې د نوموړي د ټولو لیکنو د بیا خپرولو حق له یاران سره خوندي دی.