سپورټ کرکټ وزش او تمرین

اشیش نهرا: راشدخان به په IPL سیالیو کې ښې لاسته راوړنې ولري

لیکنه: محمدصابر حمیدي

د هندوستان د کرکټ ملې لوبډلې پخواني نامتو چټک توپواچونکي اشیش نهرا د راشدخان ارمان په ګډون د هغو لوبغاړو نومونه په ډاګه کړي، چې سږ کال به په آی پي ایل سیالیو کې ښه ولوبیږي او د لوبډلو په ګټه به خورا مثبت تمام شي.

هغه د راشدخان ارمان ترڅنګ د ویسټ انډیزي کیرون پولارډ او د سویلي افریقا د کرکټ ملې لوبډلې سلو توپ اچونکي عمران طاهر یادونه کړې، چې سږ کال به په آی پي ایل سیالیو کې ښې سیالۍ ترسره کړي.

د اشیش نهرا په خبره دا لوبغاړي به ځکه په آی پي ایل سیالیو کې ښه ولوبیږي، چې تر آی پي ایل مخکې دوی د ویسټ انډيز هیواد په کورنیو تجارتي سیالیو کې لوبیږي او دا لیګ به  IPL ته د چمتوالي برخه کې ورسره ډېره مرسته کوی.

هغه زیاته کړه:

«زه غواړم دا ووایم، هر لوبغاړی چي سي پي ایل ولوبوي، هرو مرو به په آی پي ایل سیالیو کې له ځانه ښه وړتیا وښوي. خو راشدخان ارمان، کیرون پولارډ او عمران طاهر به د نورو لوبغاړو په پرتله هتمن بریالي وي.»

ټاکل شوې د ویسټ انډیز هیواد د کرکټ تجارتي سیالۍ«CPL» راتلونکې سې شنبه د اګسټ میاشتې په ۱۶مه نېټه د ۶ افغان لوبغاړو په شتون کې پيل شي او سیپټمبر میاشتې تر ۱۰مي نېټې پوري دوام وکړي.

د هند آی پي ایل لوبې بیا د راتلونکې سیپټمبر میاشتې په ۱۹مه نېټه د متحده عربي اماراتو په کوربتوب پیلیږي او د نوومبر میاشتې تر ۱۰مې نیټې پوري دوام کوي.

آی پي ایل تر سي پي ایل ۹ ورځې وروسته پيلیږي.

د لیکوال/ لیکوالې په اړه

محمد صابر حمیدي ، کندهار

محمد صابر حمیدي په کندهار کې د یاران د کاري ټیم غړی دی. نوموړی د کندهار پوهنتون د ښووني او روزنې پوهنځی د پښتو څانګې څخه فارغ شوی. په کندهار کې د ” زما“ راډیو سره په خبري برخه کې کار کوي. صابر د فوټبال لوبغاړی دی. یاران ته په سپورټي، ټولنیزو او نورو برخو کې لیکنې او مطالب چمتو کوي. په یاران کې د نوموړي د ټولو لیکنو د بیا خپرولو حق له یاران سره خوندي دی.

تبصره مو ولیکئ