افغانستان اقتصاد سرسکالو سفر

د اریانا افغان هوایي شرکت د سوداګریزو مالونو د لیږد طرحه نهایي شوه

لیکنه: بشر درویش

راپور: بشر درویش

ولسمشر اشرف غني اریانا افغان هوایي شرکت کې د بنیادي اصلاحاتو په برخه کې دې عملي اقدامات وشي.

ارګ وايي، د افغانستان جمهوررئیس محمداشرف غني پرون له غرمې مخکې د اریانا افغان هوایي شرکت مسوولینو سره په یاد شرکت کې د اصلاحاتو د تطبیق او د اړوندو الوتکو کې د اموالو د لېږد په اړه د ویډیو کنفرانس له لارې خبرې وکړې.

نهايي شوې طرحه

په دغه ویډیو کنفرانس کې چې په ارګ کې ترسره شو، د چارو ادارې عمومي رئیس، د مالیې او صنعت او سوداګرۍ وزارتونو سرپرستانو هم حضور درلود، په پيل کې د اریانا افغان هوایي شرکت عمومي رئیس د یاد شرکت الوتکو کې د سوداګریزو مالونو د لېږد په اړه خپل راپور غونډې ته وړاندې کړ او وې ویل، د صنعت او سوداګرۍ وزارت او د افغانستان د سوداګرۍ او صنایعو خونې په همکارۍ یې د اریانا افغان هوایي شرکت د سوداګریزو مالونو د لېږد (Cargo)طرحه نهایي کړې ده .

هغه زیاته کړه:

«د یادې طرحې عملي کولو سره به د تاجرانو مالونه لکه تازه مېوې او د لومړنیو توکو صادرات او واردات د دې شرکت د الوتکو له لوري وشي. همدارنګه د هیواد کرنیز حاصلات به د کرونا ویروس اوسني وضعیت ته په کتو د سیمې بازارونو ته ورسېږي.»

ارګ وايي، وروسته د صنعت او سوداګرۍ وزارت سرپرست اجمل احمدي وویل، دا وزارت چمتو دی اریانا افغان هوایي شرکت او د افغانستان د سوداګرۍ او صنایعو خونې سره د کارګو د انتقال پلان د عملي کېدو په اړه لازمې اسانتیاوې برابرې کړي.

اریانا افغان هوایي شرکت مسوولینو سره ناسته – ارګ

د لازمو اقداماتو غوښتنه

ولسمشر غني د اریانا افغان هوایي شرکت د راپور له اورېدو وروسته د مالیې او صنعت او سوداګرۍ وزارتونو سرپرستانو ته لارښوونه وکړه چې د اسیا پراختیایي بانک په همکارۍ د کارګو د انتقال طرحې عملي کولو لازم اقدامات وکړي.

نوموړي په ټینګار سره وویل:

«صادرات او خصوصي سکتور دې پیاوړی شي او په بندرونو په ځانګړي ډول حامدکرزي بین المللي هوایي ډګر کې دې پانګونه وکړي، تر څو خصوصي سکتور او تاجرانو ته لازمې اسانتیاوې برابرې شي.»

سرچینه وايي، ښاغلي غني د اریانا هوایي شرکت مسوولین موظف کړل چې د اریانا افغان هوایي شرکت کې د بنیادي اصلاحاتو په برخه کې د دولتي شرکتونو د انسجام د واحد رئیس په همکارۍ عملي اقدامات وکړي.

Advertisements

د لیکوال/ لیکوالې په اړه

بشر درویش

بشر درویش د یاران د کاري ټیم غړی دی، چې پر بیلابیلو مسلو د یاران لپاره راپورونه او مطالب چمتو کوي

تبصره مو ولیکئ