مارچ 9, 2021

بلخ، خوست او تخار کې ۱۴۳۲ کرنیزې پروژې پيل شوې

Advertisements

راپور: بشر درویش
د افغانستان د کرنې وزارت وايي، د کرونا په پېر کې د «کرنیزو محصولاتو مدیریت» د پروژې چارې د یوشمېر نورو ولایتونو ترڅنګ د بلخ، خوست او تخار په ولایتونو کې هم پیل شوې.
ټاکل شوې، چې ددې برنامې په اډانه کې د کرنې وزارت له خوا په یادو درېوو ولایتونو کې د ۶۸۰ میلونه او ۱۴۹ زره او ۱۳۰ افغانیو په لګښت یو زر او ۴۳۲ کرنیزې پروژې پلی شي.

بلخ او ۸۲۰ پروې

بلخ کې د کرنیزو محصولاتو مدیریت د پروژې په اډانه کې د ۴۰۵ میلیونه افغانیو په لګښت د ۸۲۰ پروژو د پلي کېدو چارې پرون رسماً پیل شوې.
ټاکل شوې، چې د کرنې وزارت په بلخ ولایت کې د کرنیزو محصولاتو مدیریت د طرحې په اډانه کې، ۲۰۰ ممیزخونې، د پیازو ۴۰۰ زېرمتونونه، د کچالو ۱۰۰ زېرمتونونه او د مېوې د زېرمه کولو په پار ۲۰ صفر انرژۍ سارک سړې خونې جوړ کړي. دغه راز ددې طرحې په اډانه کې د سبو او مېوو ۱۰۰ وچوونکي دستګاوې، چې په لمریزه انرژۍ کار کوي، د بلخ پر بزګرانو او بڼوالو وېشل کیږي.

خوست او ۲۵۰ پروژې

د خوست په ولایت کې د کرنیزو محصولاتو مدیریت د پروژې په اډانه کې د ۹۵ میلیونه او ۵۰۰ زره افغانیو په لګښت د ۲۵۰ پروژو د پلي کېدو چارې د دې ولایت د سیمه ییزو چارواکو په شتون کې پیل شوې.
ټاکل شوې، چې د کرنې وزارت په خوست ولایت کې د کرنیزو محصولاتو مدیریت د طرحې په اډانه کې، د پیازو او کچالو ۲۲۰ زېرمتونونه جوړ کړي. دغه راز ددې طرحې په اډانه کې د سبو او مېوو ۳۰وچوونکي دستګاوې، چې په لمریزه انرژۍ کار کوي، پر خوستي بزګرانو او بڼوالو وېشل کیږي.
د خوست د کرنې ریاست وایي:

«دیادو پروژو په پلي کېدو سره دوه زره او ۲۰۰ کسانو ته په مستقیم ډول د کار زمینه برابریږي او په یادو زېرمتونونو کې به دوه زره او ۴۵۰ ټنه پیاز او کچالو وساتل شي.»

د خوست ولایت یوتن بزګر سیدالله د کرنې له وزارت څخه مننه وکړه، چې د بزګرانو لپاره اسانتیاوې برابروي. سیدالله وویل، چې د پیازو او کچالو د زېرمتونونو په جوړولو سره به د بزګرانو کرنیز تولیدات خوندي شي او بزګران به له اقتصادي زیانونو په امن وي.

تخار کې ۳۶۲ پروژې پیل شوې

تخار کې هم د کرنیزو محصولاتو مدیریت د پروژې چارې ددې ولایت د سیمه ییزو چارواکو په شتون کې پیل شوې.
د تخار د کرنې ریاست وایي، چې د کرنیزو محصولاتو مدیریت د طرحې په اډانه کې تخار لپاره د ۱۷۹ میلیونه او ۶۴۹ زره او ۱۳۰ افغانیو په لګښت ۳۶۲ کرنیزې پروژې پلي کیږي.
د تخار د کرنې ریاست وایي:

«په دغو پروژو کې ۵۰ ممیزخونې، د پیازو ۱۵۰ زېرمتونونه، د کچالو ۱۲۰ زېرمتونونه، د مېوې د زېرمه کولو په پار ۱۰صفر انرژۍ سارک سړې خونې جوړول او پر یوشمېر بزګرانو د مېوو اوسبو د ۳۲ لمریزو وچوونکو دستګاو وېش شامل دي.»

کرونا او بزګرانو سره مرسته


د کرنې وزارت وايي، د کرونا په پېر کې د کرنیزو محصولاتو د مدیریت طرحه د بڼوالو او بزګرانو اړتیاوو ته په کتو، د دوی لپاره کرنیز بنسټونه جوړوي. بزګران او بڼوال د دغو بنسټونو د جوړولو یوازې ۱۰ سلنه لګښت ورکوي او ۹۰ سلنه نور لګښت یې د کرنې وزارت له خوا ورکول کیږي.
ددې طرحې په اډانه کې، په بېلابېلو ولایتونو کې بڼوالو او بزګرانو لپاره زرګونه ممیزخونې، د پیازو او کچالو زرګونه زېرمتونونه او د مېوو د ساتنې په پار سلګونه صفر انرژۍ سارک سړې خونې جوړیږي. دغه راز ددې برنامې پر اساس، پر بڼوالو او بزګرانو د مېوو او سبو زر وچوونکي آلې هم وېشل کیږي.
یاد وزارت ویلي؛ دغه طرحه د روان مالي کال تر پایه په بشپړه توګه عملي کیږي او د پلي کېدو پر وخت او له هغه وروسته زرګونو کسانو ته د کار زمینه برابروي.

لومړي کس و اوسه چې پر دې لیکنه نظر لیکي

نظر مو ولیکئ

ستاسو د ایمیل پته نه خپریږي