غني، مذاکراتي پلاوي ته: زموږ اساسي موخه پرمختللی افغانستان او د جګړې پای ته رسول دي

راپور: بشر درویش

افغان ولسمشر محمداشرف غني پرون له غرمې مخکې د سولې مذاکره کوونکي پلاوي سره په چهار چنار ماڼۍ کې وکتل.
ولسمشرۍ ماڼۍ وايي، د افغانستان اسلامي جمهوریت د سولې مذاکره کوونکي پلاوي مشر محمدمعصوم ستانکزي وویل چې سوله د افغانستان د خلکو لویه هیله او غوښتنه ده او د سولې مشورتي لویې جرګې د ملي ګټو او ازادې ټولنې پر بنسټ د دې لپاره حدود ټاکلي.
هغه زیاته کړه، زموږ د متحد ټیم هڅه به د خلکو دغسې اساسي هیلې ته چې تلپاتې سوله ده، رسېدل وي.

د افغان ولس ملاتړ درسره دی !

دې ناسته کې ولسمشر اشرف غني وویل چې د افغانستان اسلامي جمهوري دولت د پرلپسې هڅو په پایله کې د سولې دغه حساس پړاوو ته رسېږي او تاسو د واحد او منسجم ټیم په توګه د افغانستان د خلکو او دولت په استازیتوب له طالبانو ډلې سره د سولې مذاکرات پیلوي.

هغه زیاته کړه، زموږ ملي وثیقې چې اساسي قانون دی، زموږ ټولو لپاره حدود مشخص کړي دي.

ولسي او ملي ټیم

ولسمشر غني وویل:

«د سولې مذاکره کوونکي پلاوي په ترکیب کې زموږ علما، ښځې او ځوانان هر یو خپل ملي او سیاسي وزن لري او دوی به زموږ د ټولنې د هرې برخې او قشر ښه استازولي وکړي، ځکه چې مطلق ولسي او ملي ټیم دی.»

د تاوتریخوالي پای ته رسول

ولسمشر غني وړاندې وویل:

«د ملي، سیمه ییزې او نړیوالې اجماع په وجود کې زموږ مطلوبه موخه پرمختللی، ازاد، متحد، خپلواک او سوله ییز افغانستان دی. زموږ د پلاوي اساسي موخه په اساسي توګه د تاوتریخوالي پایته رسول دي، ځکه خلک تلپاتې سوله او د نوې ټولنې د ارزښتونو ساتنه غواړي.»

هغه په ټینګار ویلي؛ دولت د سولې پروسه کې خپلې ټولې هغه ژمنتیاوې چې نړیوالې ټولنې یې هیله لرله، عملي کړي او د طالب زندانیانو ازادول سولې ته د دولت د ژمنتیا څرګند ثبوت دی.

عبدالله: پلاوی د ټولو استازیتوب کوي

د ملي روغې جوړې عالي شورا رئیس ډاکټر عبدالله عبدالله د سولې مذاکره کوونکي پلاوي ته په خطاب کې وویل، تاسو د افغانستان د دولت او خلکو ټینګ ملاتړ څخه برخمن یاست او د مذاکراتو په جریان کې به د ملي واکمنۍ، ملي ارزښتونو او ملي ګټو  د ساتنې، د جمهوریت، د ښځو د حقونو، بیان ازادۍ او د امنیتي او دفاعي ځواکونو د ټینګ ملاتړ لپاره د قربانیانو د کورنیو په ګډون د افغانستان د ټولو خلکو استازیتوب کوئ.
ښاغلي عبدالله وویل:

«ستاسو ترکیب د افغانستان تنوع تمثیلوي. واحد ټیم او واحد غږ زموږ د عظیم ملت استازیتوب کوي. د افغانستان دولت د سولې پروسه کې خپل ټینګ عزم ښودلی، ځکه د طالب بندیانو ازادول اسانه تصمیم نه و او سولې ته د رسېدو لپاره تاسو د افغانستان د خلکو د هیلو استازیتوب کوئ.»

ولسمشرۍ ماڼۍ ویلي؛ د دغې غونډې په پای کې جمهوررئیس غني وویل، د افغانستان د خلکو هیله داده چې د سولې په مذاکراتو کې د تاوتریخوالي پر کموالي او دایمي اوربند توافق وشي، ترڅو ژر تر ژره تلپاتې او باعزته سولې ته چې زموږ د ټولو هیوادوالو هیله ده ورسېږو.

بندیان او د مذاکراتو پيل

دا په داسې حال کې ده چې په د افغان دولت یوه تخنیکي ډله قطر ته رسیدلې او ټاکل شوې چې نن به مذاکراتي پلاوی هم قطر ته روان او بین الافغاني خبرې به پيل شي.
ویل شوي چې د دواړو لوریو ترمنځ د بندیانو تبادله بشپړه شوې ده. ویل شوي د افغان کمانډو ځواکونو دوه وروستي سرتیري چې له طالبانو سره په بند کې ول ازاد او افغان حکومت ته وسپارل شول.

د افغان حکومت سرچینو ویلي چې ددوی سرتیري راخوشې شوي دي. خو بل پلو یو شمیر سرچینو ویلي ول چې ۲۴ افغان کمانډویان له طالبانو سره بندیان ول.
د افغان ولسمشر لومړي مرستیال امرالله صالح ویلي چې ددوی بندیان دقیق شوي او خوشې شول ځکه د طالبانو سره تبادلې صورت ونیوه.
همداراز ویل شوي چې د طالبانو پاتې ۴ سوه بندیان هم خوشې شوي دي او یوازې ۷ هغه طالب بندیان چې فرانسې او استرالیا یې پر نه خوشې کیدو ټینګار کاوه، نه دي خوشې شوي او دا به قطر کې نظر بند ساتل کیږي.
 

Be the first to comment

Leave a Reply

Your email address will not be published.







وروستي مطالب