افغان فلم ۵۲ کلن سو!

خبريال: مدثر دعوت
د افغان فلم سېنما ۵۲مه کليزه ولمانځل سوه.
د افغان فلم ۵۲مه کليزه د د اطلاعاتو او فرهنګ د وزير،د فرهنګ او هنر معين ،د سېنما تجربه کاره لوبغاړی ممنون مقصودي،د افغان فلم د رئيسي صحرا کريمي،د پوهنتونونو استادانو او سېنمايي لوبغاړو په شتون کې ولمانځل سوه.


د افغان فلم د کليزې په وياړ د علومو د اکاډمۍ له لورې ۱۰۰ جلده کتابونه هم ورته ډالۍ سوه.

د اطلاعاتو او فرهنګ نوماند وزير طاهر زهير د مراسمو پرمهال خبرو کې افغانستان د سېنما په صنعت کې يو مصرفي هيواد ياد کړ.
نوموړي وويل چې افغانستان کې د سېنما د پرمختګ لپاره هيڅ مشخصه کړنلاره نسته ، موږ يو مصرف کوونکی هيواد يوو نه توليد کوونکی،دی وايي متاسفه يم چې د افغان سېنما په برخه کې لومړنۍ اړتياوي هم نسو پوره کولای.
د افغان سېنما مشهور او تجربه لرونکي لوبغاړي ممنون مقصودي د افغان فلم د راتلونکي لپاره هېله مندي وښوده.

نوموړي وويل که څه هم ځينو مهمو فلمونو باندې پانګونه ونسوه خو په کابل پوهنتون کې د هنرونو پوهنځۍ د سېنما په برخه کې ځوانان تربيه کوي چې د دوی تر روزلو وروسته به زموږ هيلې او ارمانونه پوره کېږي.
د افغان سېنما لوبغاړي وايي چې ۱۳۹۹ ه ل کال د سېنما لپاره ښه نه وو، ځکه په وروستيو ۶ مياشتو کې ۱۴ فلم جوړونکې او فلمي اداکاران مړه سويدي.
د افغان فلم د ۵۲مې کليزې پر مهال د افغان سېنما بيلابيلو ښځينه او نارينه لوبغاړو ته ستاينليکونه هم ورکړل سوه.

په افغانستان کې د لومړي ځل لپاره د شاه غازي امان الله خان له لورې سېنما پرانيستل سوه،خو افغان فلم د يوازنۍ دولتي سېنما په حيث په ۱۳۴۷ ه ل کې د محمدظاهر شاه په دوره کې جوړه سوه.

د ۱۳۹۸ ه ل کال د ثور په ۲۶مه نېټه صحرا کريمي د افغان سېنما په تاريخ کې د لومړنۍ ښځينه رئيسي په حيث د افغان فلم رئيسه وټاکل سوه.

لومړي کس و اوسه چې پر دې لیکنه نظر لیکي

نظر مو ولیکئ

ستاسو د ایمیل پته نه خپریږي




وروستي مطالب