نړيوال بانک د یوې اعلاميې په خپرولو سره له افغانستان سره د ۸۵میلیون ډالرو مرستې اعلان وکړ.
د نړيوال بانک په اعلامیې کې چې د دوشنبې پر ورځ د ليندۍ پر ۲۲مه خپره شوه، راغلي دي چې دغه مرستې د ۳۹۳میلیون ډالرو مرستو يوه برخه ده چې نړيوال بانک یې افغانستان ته د بیارغونې مرستو په توګه ورکوي او دغه مرستې به د کورونا په لمنځه وړلو، پاکو اوبو ته د لاسرسي، د روغتیا او ټولګټو برخو د پياوړي کولو لپاره مصرفېږی.
په افغانستان کې د کورونا وایروس خپرېدل، د ډېرو اقتصادي او ټولنيزو ستونزو د رامنځته کېدو لامل شوی. دا په داسې حال کې ده چې د افغانستان وګړي د کورونا وایروس د خپرېدو ترڅنګ له جګړې سره هم مخ دي، د ډېری کورنيو ژوند په ورځني مزد ولاړ دی، د څښلو پاکو اوبو ته لږ او یا بېخي لاسرسی نه لري، روغتیا او روغتيايي چوپړتیاوو ته هم لاسرسی نه لري.
نړيوال بانک لیکلي دي، چې د دغو مالي مرستو ۵۰ میلیون ډالره د نړيوالې پرمختيايي ادارې له خوا په افغانستان کې د پاکو اوبو د چمتو کولو، روغتیا او د بیارغونې د ملاتړ لپاره ځانګړې شوې دي.
د دغې اعلاميې له مخې د دغو مالي مرستو مجموعه د افغانستان د بیارغونې د کڅوړې ۱۵۰میلیون ډالرو مرستو په ګډون ۲۰۰میلیون ډالرو ته رسېږي.
همدارنګه ۳۵میلیون ډالره مالي مرستې د نړيوالې پرمختيايي ادارې له خوا د ولسي تړون د ملي پروګرام لپاره ځانګړې شوې دي. د دغو مالي مرستو مجموعه ۱۹۳میلیون ډالرو ته رسېږي چې ۱۵۸میلیون ډالره یې د افغانستان د بیارغونې کڅوړې له خوا ورکول کېږي.
باید وویل شي چې د افغانستان د روغتیا وزارت د اطلاعاتو پر بنسټ تر دې مهاله په افغانستان کې ۴۸۹۵۲ کورونایې ناروغان په رسمي ډول ثبت شوي دي.
تبصره مو ولیکئ