له ايف ټي پي پرته افغان ملي لوبغاړي پبجي ته ښه وزګار دي.

ليکوال: خپلواک دريځ
د افغانستان کرېکټ ملي لوبډله د ۲۰۲۱م کال تر وروستۍ مياشتې له ايف ټي پي پرته هيڅ ډول سيالۍ نه لري.
د افغانستان کرېکټ ملي لوبډله يوازينی لوبډله ده چې د افغان کرېکټ بورډ پرته يې يوازې د کرېکټ نړيوالې شورا پلان سويو لوبو ته سترګې نيولي دي. د کرېکټ نړيوالې شورا د هر هېواد لپاره کلنۍ سيالۍ ټاکلي او افغانستان لپاره هم په دې لړ کې شل اوريزه، يو ورځنۍ او ټيسټ سيالۍ برابري سوي دي.
د افغانستان کرېکټ بورډ تراوسه په دې نه دی توانېدلی چې روان کال او يا هم راتلونکي ۲۱م لپاره افغان کرېکټ ملي لوبډلې ته په خصوصي توګه لوبې برابرې کړي خو د کرېکټ نړیوالې شورا په ۲۰۲۱م کال کې افغان کرېکټ ملي لوبډلې ته ۳۴ بېلابېلې لوبې ورکړي دي.
تیره ورځ په يوه ټويټ کې د کرېکټ بورډ مشر فرهان يوسفزي د ای سي سي د ايف ټي پي(د لوبيزو سفرونو پلان) لوبو مهالوېش خپور کړی تر څو په دې ډول د کرېکټ لوبغاړو، مینه والو او منتقدینو خولې له ځانه واړوي، د افغانستان کرېکټ بورډ نوې رهبري د خپل کار له پيله تراوسه له نورو هيوادونو سره په لوبو برابرولو نه ده بريالۍ سوې. بلخوا د کرېکټ بورډ مشر له تيرو دريو مياشتو راهيسي لندن کې پاته دی.


کرېکټ بورډ وايي نورو هېوادونو سره مو د لوبو نيولو هڅې کړي خو هغوي تل منفي ځواب راکړئ او خپل راتلونکی مهالوېش يې ډک بللی دی.
د افغانستان کرېکټ ملي لوبډله به د اسيا جام او شل اوريزه نړیوال جام باوجود له ايرلينډ، سريلانکا، زمبابوې، پاکستان، عرب امارات، ويسټ انډیز، اسټراليا او هندوستان سره ټيسټ، يو ورځنۍ او شل اوريزه لوبې ولري.
دغه سياليو کې چې د ۲۰۲۱م کال له پيل سره پيليږي افغانستان پکې په جنورۍ او فبرورۍ کې له ايرلينډ سره ۳ يو ورځنۍ او يوه ټيسټ.
فبروری او مارچ کې زمبابوې سره ۳ شل اوريزه او ۲ ټيسټ.
جولای او اګسټ کې سريلانکا سره ۳شل اوريزه او ۳ يو ورځنۍ.
اګسټ او سپټمبر کې پاکستان او عرب اماراتو سره ۳ شل اوريزه او ۳ يو ورځنۍ.
سپټمبر کې هندوستان سره ۳ يو ورځنۍ.
سپټمبر او اکتوبر کې اسټراليا سره ۳ يو ورځنۍ.
اوکتوبر کې اسټراليا او ويسټ انډیز سره درې اړخيزه لوبلړۍ.
او ډيسمبر کې زمبابوې سره ۳ شل اوريزه، ۳ يو ورځنۍ او يوه ټيسټ لوبه لري.
افغان کرېکټ ملي لوبډله اوسمهال د کابل په لوبغالي کې د زمبابوې سره راتلونکو سياليو لپاره تمرينات ترسره کوي چې تمه ده جولای یا اګست مياشت کې وسي خو په لوی احتمال سره ويل کيږي چې ممکن دغه لوبې د کورونا وايروس له بيرې ترسره نسي.

لومړي کس و اوسه چې پر دې لیکنه نظر لیکي

نظر مو ولیکئ

ستاسو د ایمیل پته نه خپریږي