فبروري 25, 2021

کندهار کي د نړیوال جام په نوم د فوټسال لوبي پای ته ورسېدې

یوه میاشت مخکي د کندهار په لوبستان ورزشي  جمنازیم کي د ۱۶ قوي لوبډلو ترمڼخ د نړیوال جام په نوم د فوټسال ستري لوبي ترسره سوې، چي د افغانستان په نوم د یوې فوټسال لوبډلي په لومړي مقام خپلولو سره پای ته ورسېدې.

په لوبستان ورزشي جمنازیم کي د یادو سیالیو مسئول بلال احمد عرفان یاران ته وویل، چي د نړیوال جام په نوم ئې د یاد ټورنمنټ سره سم ګډونوالو لوبډلو ته د افغانستان په ګډون د بهرنیو هیوادونو نومونه ټاکلي وه، چي پایلوبه ته ئې افغانستان او ندرلینډ لوبډلي لاره پيداکړه.

د عرفان په خبره، چي په یاده لوبه کي د افغانستان فوټسال لوبډلي ۳ ګولونه پر ۲ د ندرلینډ فوټسال لوبډلي ته ماته ورکړه او لومړی مقام ئې خپل کړ.

د یادو سیالیو د مسئولینو له لوري وروسته مقام لرونکو لوبډلو او غوره لوبغاړو ته جایزې ورکړل سوې.

د یادو سیالیو ډېر ګولوهونکی لوبغاړی شبیراحمد، محمد رامین غوره لوبغاړی، نقیب الله تر ټولو ځوان لوبغاړی، حبیب الله غوره ګول ساتونکی، فرید احمد غوره دفاعي لوبغاړی، محمد عمر سلیمي غوره روزونکی او  کروشیا ټيم ته بیا د غوره اخلاقي لوبډلي جایزه ورکړل سوه.

کندهار کي دا مهال ۶ معیاري جمنازیمونه شتون لري، چي د شپې تر ناوخته پوري ئې دوستانه او ټورنمنټي لوبي خورا په جم او جوش رواني وي.