کلکتې ۱۰۰مه لوبه په قوي هدف وګټله.

د خپریدو وخت: اپریل 29, 2019

مدثر دعوت

ليکنه: مدثر دعوت
د ۲۰۱۹ز کال هندوستان پريمرليګ ۴۷مه لوبه د روان پړاو د جالبو لوبو څخه وه.
ممبی انډينز او کلکته نايټ رايډرز لوبډلي د ليګ په مهم پړاو کي سره مخ سولې.
د لوبي پچه ممبی وګټله او کلکتې ته يې د توپوهني بلنه ورکړه.
کلکتې چي پرلپسې ۶ لوبي بايللي وې زغم يې دلاسه ورکړی وو او په ۲۰ اوورونو کي يې د ۲ لوبغاړو په سوځيدو ۲۳۳ منډي لوړ هدف وټاکه.

د کلکتې اوپنرانو کريس لين او شبمان ګيل تر لسم اووره د ۹۶ منډو ملګرتيا وکړه.
د لسم اوور په دريم توپ کریس لين په ۲۹ توپونو د ۵۴ منډو په کولو سره وکيټه د لاسه ورکړه.
د معمول په خلاف ترلين وروسته انډري رسل توپوهني ته راغی او د ګيل سره يې قوي ملګرتيا جوړه کړه.
کلکتې په ۱۶م اوور کي دويمه وکيټه ګيل د لاسه ورکړ.

ګيل په ۴۵ توپونو ۷۶ منډي وکړې او کلکتې ته يې د قوي هدف د ايښودلو اسانتيا جوړه کړه.
انډري رسل يوځل بيا د پخوا په څير د توپ اچوونکو هيڅ احترام ونکړ.
نوموړي په ۴۰ توپونو ۸۰ منډي وکړې او د لوبغالي ۴ واړه اړخونو ته يې ۸ شپږيزي ووهلې.

د ممبی ۵ توپ اچوونکو په هر اوور کي تر ۱۰ ډيري منډي ورکړې، يوازي چاهار او هارديک پانډيا يوه يوه وکيټه واخيستله.
د کلکتې د ۲۳۲ منډو هدف ته د ځان رسولو لپاره د ممبی اوپنرانو هيڅ ښه پيل و نکړ.
ډيکوک په صفر او روهيت شرما په ۱۲ منډو وسوځيدل.
ورپسې ليويس ۱۵ ، سريا کمار ياداو ۲۶ ، پولارد ۲۱ او کرونال پانډيا ۲۴ منډي وکړې.
خو هارديک پانډيا ليونۍ او بريدګره توپوهنه وکړه،د کلکتې هيڅ توپ اچوونکی يې بې شپږيزو او څلوريزو پرينښودی، او د کلکتې لوبغاړي او مينوال يې وويرول.

هاردیک يوازي په ۳۴ توپونو ۹۱ چټکي منډي وکړې چي د لوبي دويمي پاړۍ ته يې ځانګړې ښکلا ورکړه.
د کلکتې توپ اچوونکو سونيل نارين ، ګورني او رسل دوې دوې وکيټي واخيستلې.
خو پيوش چاولا د يوې وکيټي په اخيستلو سره په IPL کي ۱۵۰ وکيټي پوره کړې.

ممبی په پوره ۲۰ اوورونو کي د ۷ لوبغاړو په سوځيدو ۱۹۸ منډوي وکړې او کلکتې د ۳۴ توپونو په توپير د ۶ پرلپسې ماتو وروسته په شل اووريز کرکيټ کي سلمه لوبه وګټله.
انډري رسل د ۸۰ منډو، ۲ وکيټو او ۲ کيچونو په نيولو سره د لوبي غوره لوبغاړی سو.

ممبی اوسمهال په ۱۲ لوبو کي د ۷ لوبو په ګټلو سره د جدول په دريم او کلکته بيا په ۱۲ لوبو کي د ۵ لوبو په ګټلو سره د جدول په پنځم ځای کي قرار لري.
هيره دي نه وي چي نن ماښام ۰۷:۰۰ بجې د پنجاب او حيدر اباد لوبه ده.