ليکنه: سميع الله درانی
روېندر پال سېنګ چې په خټه هندوستانی دی، په کاناډا کې یې په خپله لومړۍ شل اوریزه لوبه کې، چې د پیل لوبه یې وه، ریکارډ جوړ کړ، هغه په ۴۸ توپونو ۱۰۱ منډې وکړې او په دې ډول یې د یو نوي لوبغاړي په توګه د نوي ریکارډ بنسټ کېښود.
هغه په دغه ریکارډ سره د اسټرالیایي ریکي پونټېنګ ریکارډ مات کړ او د جدول سر کې یې لومړی مقام قایم کړ.
پال سېنګ د کرکټ نړیوالې شورا د نارینه شل اوریزو غوراوي سیالیو په لړکې د کېمان جزیرې یا اېزلېنډ خلاف لوبه کې لس سترې شپږیزې او ۶ څلوریزې ووهلې او په ۴۷ توپونو یې سلیزه پوره کړه.
دی په منځنۍ برخه کې توپ وهنې ته راښکته شو او دا کارنامه یې وکړه.
له دې وړاندې په ۲۰۱۲ م کال کې رو وېنډو ګوناسېکارا لومړی کاناډایي و، چې د عربي متحده اماراتو پر وړاندې یې په شل اوریزه لوبه کې لوړې منډې کړې وې، ده ۹۵ منډې کړې وې؛ خو اوس روېندر پال سېنګ دا ریکارډ مات کړ او د نړۍ په کچه لومړی توپ وهونکی شو، چې په خپله لومړۍ شل اوریزه یا د پیل لوبه کې سلیزه وهي.
روېندرپال سېنګ په نارینه او ښځینه توپ وهونکو کې لومړی نمبر شو، چې دومره منډې جوړوي.
د هغو لوبغاړو نوملړ چې په خپله لومړۍ شل اوریزه لوبه کې یې زیاتې منډې کړي
لومړی کاناډایي روېندرپال سېنګ ۲۰۱۹ کال کې ۱۰۱ منډې، دوهم بیا ریکي پونټېنګ ۲۰۰۵ م کال کې یې د نیوزیلېنډ خلاف ۹۸ ناسوځېدلې منډې کړې وې، دریم ښځينه اسټرالیایي توپ وهونکې کارین رولټن ده، ۲۰۰۵ کال کې یې د انګلستان ښځینه لوبډلې پر وړاندې ۹۶ ناسوځېدلې منډې کړې وې، څلورم ویسټ انډیزۍ ښځينه لوبغاړې ټېلر ده، هغې د ایرلېنډ ښځینه لوبډلې پر وړاندې په ۲۰۰۸ کال کې ۹۰ منډې کړې وې.
پنځم بیا ډېوېډر وارنر دی، هغه په ۲۰۰۹ م کال کې د افریقا خلاف ۸۹ منډې کړې وې.
هارشل پټېل د کاناډا لپاره د ایرلېنډ خلاف په ۲۰۱۰ م کال کې ۸۸ ناسوځېدلې منډې کړې وې.
د نېدرلېنډ ښځینه لوبغاړې کېلېس د عربي متحده اماراتو لوبډلې پر وړاندې په ۲۰۱۸ م کال کې ۸۸ ناسوځېدلې منډې کړې وې.
عدنان ادریس د کوېټ لوبډلې لپاره په قطر ۷۹ منډې کړې وې، البته ۲۰۱۹ م کال کې.
ریلي روسوو د سویلي افریقا لپاره په ۲۰۱۴ م کال کې په اسټرالیا په خپله لومړۍ شل اوریزه لوبه کې ۷۸ مندې کړې وې.
او انګلستاني ډېوېډملن په ۲۰۱۷ م کال کې د سویلي افریقا پر وړاندې ۷۸ منډې کړې وې.