Advertisements
روغه سټه

ډېر خوب کول؛ په شکر او د زړه په ناروغۍ د اخته کېدو ګواښ زیاتوي.

ژباړه: نسیمه محمدي

کافي خوب، د ښکلي پوستکي، روغ بدن او د آرام ذهن درلودلو لپاره اړین دي، مګر ډېر خوب کول هم بدې پایلې لري.

ډېر خوب په ډېری ناروغیو د اخته کېدو سره تړاو لري او معمولا وړاندیز کېږي لویان په شپه او ورځ کې تر ۹ ساعتونو پورې خوب وکړي.

وړاندې د ډېر خوب له امله د ځینو ستونزو او ناروغیو په اړه یادونه کېږي.

ډېر خوب د سردرد لامل ګرځي

له نارمل حالت زیات خوب کول، چې معمولا د تعطیلاتو پر وخت پېښېږي پر عصبي سیالو له دې ډلې سروتونین، منفي اغېز کوي.

همدارنګه که چېرې د ورځې په اوږدو کې زیات خوب وکړئ او د شپې د اختلال سره مخ شئ، په لوړ ګمان د بلې ورځې په سهار په سردرد اخته کېږئ.

ډېر وزن( چاغښت)

د کم خوب په څېر، ډېر خوب کول هم د وزن د ډېرښت لامل ګرځي.

څېړنو ښودلې هغوی چې له ۹ ساعتونو ډېر خوب کوي، نېږدې ۲۱ سلنه یې د شپږو کالو په دوره کې د زیات وزن سره مخ دي.

څېړونکي باوري دي دا ډېر وزن د خوړنیز رژیم سره نه جبرانېږي.

ډېر خوب د بدن د وازدې د ذخیره کېدو په ډول هم اغېز لري.

د ملا درد

د ډېرو ساعتونو او د نا سم وضعیت سره خوب کولای شي د ملا درد لامل شي.

د ډېر خوب په پایله کې، عضلات شخ او د ملا درد جوړوي. د ملا درد د کمښت لپاره، د متحرک ژوند او ورزش کولو سپارښت کېږي.

د شکر ناروغۍ دویم ډول او د زړه ناروغۍ

څېړونکو څرګنده کړې ډېر خوب کول د زړه په ناروغۍ د اخته کېدو له ګواښ تړاو لري.

په حقیقت کې، ډېر خوب د زړه ناروغۍ له امله د مرګ ګواښ د زیاتېدو لامل ګرځي. همدارنګه د وزن د ډېرېدو تر څنګ د وینې د قند د زیاتېدو لامل کېږي، چې په خپل ځای په دویم ډول شکر د اخته کېدو شونتیا زیاتوي.

رواني اختلاطات

لکه څرنګه چې بې خوبي د خفګان لامل کېږي، ډېر خوب کول هم د رواني سلامتیا د پروسې د ورو کېدو سره تړاو لري.

ډېر خوب کوونکي وګړي د رواني سلامتیا له اړخه له ځینو ستونزو لکه اخلاقي بدلونونو سره مخ وي.

Advertisements

د لیکوال/ لیکوالې په اړه

نسیمه محمدي ، کابل کې د یاران د ټیم غړې

نسیمه محمدي، لېکواله، ژباړنه او د روغتیايي برخې محصله ده. نوموړې یاران ته په بیلابیلو مسالو په ځانګړې توګه روغتیا سره په تړلو موضوعګانو لیکنې، ژباړې او مطالب چمتو کوي. په یاران کې د نسیمې د خپرو شویو لیکنو د بیا خپراوي حق له یاران ادارې سره خوندي دی.