اقتصاد

چارواکو کندهار کي هم د کالدارو پر بندیز مټي راونغاړلې

د کندهار والي حیات الله حیات وايي، چي تر دوو اونیو وروسته که هر چا کندهار کي په کالدارو راکړه ورکړه وکړه، ورسره به جدي قانوني چلند کیږي.

د شنبې په ورځ د کندهار په ولایت مقام کي د افغانیو د ترویج په اړه جوړي سوې غونډه کي د کندهار والي، د ولایتي شورا غړو، د افغانستان بانک، د ښاروالۍ، د عدلي او قضایي، د حج او اوقافو، علماوو شورا،  د امنیتي او تبلیغاتي آداردو مسئولینو او آستازو ګډون کړی وو.

د پاکستانیو پیسو د بندیز په اړه دې غونډه کي لومړی ګډونوالو په کندهار کي د یاد هیواد د پیسو پر استعمال وږغېدل او وروسته ئې د بندیز په هکله یو لړ اړیني مشورې یو د بل سره شریکي کړې.

دې غونډه کي د کندهار والي حیات الله حیات وویل،که چیري په دوو اونیو کي کندهار کي په کالدارو راکړه ورکړه چا وکړه، نو به ورسره جدي قانوني چلند کیږي.

هغه په یاده غونډه کي د کندهار ولایتي شورا، علماوو شورا، حج او اوقافو، افغانستان بانک، عدلي ریاست، څارنوالۍ، د ولایت مقام سکټوري خدماتو، امنیه قومنداني او ملي امنیت ریاست ته سپارښتنه وکړه، چي د افغانیو د ترویج او د کالدارو د مخنیوي لپاره په ګډه یو د بل سره همکاري وکړي.

والي د کندهار حج او اوقافو ریاست ته هم سپارښتنه وکړه، چي راتلونکې جمعه دي د کندهار په ټولو جامع ګانو کي د ملا امامانو له لوري د کالدارو پر مخنیوي او د افغانیو پر ترویج عامه پوهای خلګو ته ورکړل سي.

کندهار کي دا ګام وروسته له هغه اخیستل کیږي، چي تازه په خوست او ننګرهار ولایتونو کي هم د کالدارو پر مخنیوي هڅي او پراخ کمپینونه پيل سوي.

کندهار یو له هغه ولایتونو دئ، چي د پاکستان سره نژدې سرحدي پوله لري او زیاتره سوداګر ئې د پاکستان سره د زیاتي راکړي ورکړي په موخه د پاکستانۍ کالدارو څخه استفاده کوي.

د لیکوال/ لیکوالې په اړه

محمد صابر حمیدي ، کندهار

محمد صابر حمیدي په کندهار کې د یاران د کاري ټیم غړی دی. نوموړی پر دې سربیره د کندهار پوهنتون د ښووني او روزنې پوهنځی د پښتو څانګې د څلورم کال محصل دی او د ” زما“ راډیو خبري برخه کې کار کوي. صابر د فوټبال لوبغاړی دی. یاران ته په سپورټي، ټولنیزو او نورو برخو کې لیکنې او مطالب چمتو کوي. په یاران کې د نوموړي د ټولو لیکنو د بیا خپرولو حق له یاران سره خوندي دی.