په کندهار کي د پستې پراخه وده او د چرګانو د غوښو نه کمښت

خبریال: فضل الله فضلي
د کندهار د کرهڼي ریاست معلومات خپاره کړي، چي پدې ولایت کي پستې خورا وده کړې ده او همدارنګه د چرګ په غوښو کي کندهار په ځان بسیا دئ.
د کندهار ولایت د کرهڼي ریاست د معلوماتو له مخي چي پدې ولایت کي د پستې کرلو زیاته وده کړې او باغونه یې له ۳۰۰۰ زرو جریبه څخه پر ډېره مځکه کي جوړ سوي دي.
پسته په دې ولایت کي نوی بوټی دئ او ددې ولایت د اقلیمي شرایطو سره پوره توافق لري.
یاد ریاست وايي چي د روان عیسوي کال د باغدارۍ او مالدارۍ د ملي پروژې په مټ یې پر ۱۲۰۰ جریبه مځکه د نورو باغونو د جوړېدو کار پیل کړئ دئ.

دوی زیاتوي، چي ددې لپاره یې ۲۲۰ تنو کروندګرو ته ۴۸۰ کېلو د پستې تخم ورکړئ دئ.
همدارنګه د کرهني ریاست وايي چي د چرګانو روزني سکتور ډېره ښه وده کړې او اوس مهال په کندهار کي ۱۱۲۰ لوی او کوچني د چرګ د غوښو او ۱۳ د هګیو فارمونه شتون لري.
د ریاست د معلوماتو له مخي، چي اوس مهال د چرګانو ۷۰۰ فارمونه فعاله دي او د ورځي په اوسط ډول تر ۴۰،۰۰۰ کېلو ګرامه غوښه او شاوخوا ۱۲۰،۰۰۰ هګۍ تولیدوي.

کندهار اوس مهال ۳۰۰،۰۰۰ هګيو ته ضرورت لري، خو عرضه یې ۶۰٪ کمه ده.
د چرګ په غوښو بیا کندهار په ځان بسیا دئ، خو د چرګانو د سکتور لویه ستونزه د مورني نسل د چرګانو کمښت یادیږي.

Be the first to comment

Leave a Reply

Your email address will not be published.