هوګو لارنس: امریکا د افغانستان پر وړاندې خیانت وکړ

امریکايي ديپلوماتان وایي امریکا له افغانستان سره خیانت کړی دی.

په کابل کې د امریکا پخواني سفیر هوګو لارنس وایي، امریکا د افغانستان پر وړاندې پر خپلو کړو ژمنو عمل و نه کړ.

دده په وینا امریکايي چارواکو له افغانستان سره د کړو ژمنو په نه عملي کولو د افغانستان او افغانانو پر وړاندې خیانت کړی دی او دا یو نه بښل کېدونکی جنایت دی.

دده په خبره د افغانستان په اړه د ټرمپ بې پروا پرېکړي او د بايډن له لوري د ټرمپ د ماموریت ادامه د افغانستان د سقوط او په دغه هېواد کې د اوسني وضعیت لامل شوه.

نوموړي په افغانستان کې د لاس ته راوړنو له منځه تلل د افسوس وړ مسئله بللې ده او ددې هر څه پړه یې د امریکایي مشرانو پر اوږو اچولې ده.

د یادونې ده چې تېره ورځ د امریکا پخواني ولسمشر ډونالډ ټرمپ چې تل له افغانستان څخه د امریکایي ځواکونو د وتلو پر څرنګوالي نیوکې کوي او اوسنی ولسمشر جو بایډن ملامت بولي، دا ځل یې د متحده ایالاتو د وسله والو ځواکونو پر لوی درستیز خوله خلاصه کړې ده او هغه یې احمق بللی دی.

ټرمپ ویلي چې مارک مېلي احمق و ځکه چې هغه د میلیاردونه ډالرو په ارزښت خورا ګران بیه او حساس پوځي وسایل په افغانستان کې پرېښي دي.

هغه ویلي چې په دې حساسو وسایلو کې د امریکا پوځي الوتکې او چورلکې هم شاملې دي.

نوموړي څرګنده کړې ده چې په دې وسایلو کې داسې الوتکې هم وې چې پنځوس میلیونه ډالر ارزښت یې لاره.

د هغه په خبره د پاتې شویو چورلکو ټول ارزښت شاوخوا ۲۹ میلیونه ډالرو ته رسېږي.

ډونالډ ټرمپ ټینګار کړی دی چې ده غوښتل ټول وسایل راوباسي او یو ځل بیا یې پخوانۍ خبره تکرار کړې ده چې په وینا یې که چېرته دی په سپینه ماڼۍ کې وای نو نور څه خو پر خپل ځای حتی یو مېخ به یې هم په دغه هېواد کې نه وای پرېښی.

About عاقله اسد 1171 Articles
په کابل کې د یاران خبریاله