سپورټ کرکټ

هند د نیوزیلینډ څخه د شل آوریزه سیالیو لړۍ وګټله!

د هندوستان او نیوزیلینډ کرکیټ ملي لوبډلو ترمنځ د نیوزیلینډ په کوربتوب د ۵ شل آوریزه سیالیو د لړۍ څخه ئې لومړۍ، دوهمه او درېیمه لوبه هندوستان وګټلې او په دې سره ئې د نیوزیلینډ څخه دا لړۍ وګټله.

هندوستان د نیوزیلینډ څخه لومړۍ لوبه په ۶ او دوهمه لوبه ئې بیا په ۷ ویکیټو ګټلې وه، خو درېیمه لوبه ئې بیا نن چهارشنبه په سوپر آور کي وګټله.

په ننۍ لوبه کي لومړی هند توپوهنه وکړه، هند په ټاکلو ۲۰ آورونو کي د ۵ لوبغاړو په سوځېدو سره ۱۷۹ منډي جوړي کړې او نیوزیلینډ ته ئې د ۱۸۰ منډو هدف وټاکی.

د هند لپاره روهیت شرما ۶۵، ویراټ کوهلي ۳۸، کیل راهول ۲۷ او آیر بیا ۱۷ منډي جوړي کړې.

د نیوزیلینډ لپاره همېش بینټ ۳ لوبغاړي وسوځول، خو میچل سانټینر او ګرینډهوم بیا یوه ـ یوه ویکیټ واخیسته.

کله چي د نیوزیلینډ لوبډله د هدف پوره کولو لپاره میدان ته کښته سوه، په ټاکلو ۲۰ آورونو کي ئې د ۶ لوبغاړو په سوځېدو سره ۱۷۹ منډي جوړي کړې او لوبه مساوي پای ته ورسېده.

په یاده پاڼۍ کي بیا د نیوزیلینډ لپاره کین ویلمسن ۹۵، کپټل ۳۱ او ټایلر بیا ۱۷ منډي جوړي کړې.

محمد شامي او شردیل ټاګور دوه ـ  دوه، خو چاهال او جدیجا بیا د نیوزیلینډ یو ـ یو لوبغاړی وسوځاوه.

تر لوبي مساوي کېدو وروسته دواړو هیوادونو د سوپر آور لوبه ترسره کړه، چي په یاد سوپر آور کي لومړی نیوزیلینډ توپوهنه وکړه.

کله چي د نیوزیلینډ دوه لوبغاړي ویلمسن او کوپټیل د ۲۱ منډو هدف پوره کولو لپاره میدان ته کښته سول، نو ۱۷ منډي ئې جوړي کړې او هند ته ئې د ۱۸ منډو هدف وټاکه.

د هند لپاره په یاد سوپر آور کي جسپریت بومرا توپ اچونه ترسره کړه.

کله چي بیا د هند لپاره روهیت شرما او کیل راهول میدان ته کښته سول، نو  د روهیت شرما د ۱۵ او د کیل راهول د ۵ منډو په کولو سره هند ـ نیوزیلیڼډ ته په یاد سوپر آور کي ماته ورکړه.

د نیوزیلینډ لپاره بیا په دې سوپر آور کي تیم سوتي توپ اچونه وکړه.

د ننۍ لوبي غوره لوبغاړی روهیت شرما وټاکل سو.

په دې سره هند د کوربه نیوزیلینډ څخه د شل آوریزه سیالیو لړۍ وګټله، خو د لړۍ څلورمه لوبه دا دوه هیوادونه راتلونکې جمعه او پنځمه لوبه بیا راتلونکې یکشنبه ترسره کوي.

د لیکوال/ لیکوالې په اړه

محمد صابر حمیدي ، کندهار

محمد صابر حمیدي په کندهار کې د یاران د کاري ټیم غړی دی. نوموړی د کندهار پوهنتون د ښووني او روزنې پوهنځی د پښتو څانګې څخه فارغ شوی. په کندهار کې د ” زما“ راډیو سره په خبري برخه کې کار کوي. صابر د فوټبال لوبغاړی دی. یاران ته په سپورټي، ټولنیزو او نورو برخو کې لیکنې او مطالب چمتو کوي. په یاران کې د نوموړي د ټولو لیکنو د بیا خپرولو حق له یاران سره خوندي دی.

تبصره مو ولیکئ