سپورټ نړیوال کرکټ

هند بیخي ښه روان دئ؛ بیا یې نیوزیلینډ ته سخته ماته ورکړه!

د هندوستان او نیوزیلینډ کرکیت ملي لوبډلو ترمنځ د نیوزیلینډ په کوربتوب د ۵ شل آوریزه سیالیو د لړۍ څخه ئې نن یکشنبه دوهمه شل آوریزه لوبه ترسره سوه، چي هندوستان په ۷ ویکیټو نیوزیلینډ ته ماته ورکړه.

په یاده لوبه کي لومړی نیوزیلینډ توپوهنه وکړه. نیوزیلینډ په ټاکلو ۲۰ آورونو کي د ۵ لوبغاړو په سوځېدو سره د ۱۳۳ منډو هدف وټاکی.

د نیوزیلینډ لپاره ګوپټیل ۳۳، سیپرټ ۳۳، مونرو ۲۶، ټایلر ۱۸ او ویلمسن بیا ۱۴ منډي جوړي کړې.

د هند لپاره جدیجا دوې، خو شیردیل ټاګور، جیسپریت بومرا او شیوان دوبي یوه ـ یوه ویکیټ واخیسته.

کله چي د هندوستان کرکیټ ملي لوبډله د هدف پوره کولو لپاره میدان ته کښته سوه، د نیوزیلینډ له لوري ورکړل سوی هدف ئې د لوبي په ۱۷،۳ آورونو کي د ۳ لوبغاړو په سوځېدو سره پوره کړ او په ۷ ویکیټو ئې د نیوزیلینډه لوبه وګټله.

د هند لپاره راهول ۵۷، شیر آیر ۴۴ او ویراټ کوهلي بیا ۱۱ منډي جوړي کړې.

د نیوزیلینډ لپاره بیا دوې ویکیټي سودهي او یو لوبغاړی بیا همېش بینیټ وسوځاوه.

د هندوستان او نیوزیلینډ کرکیټ ملي لوبډلو ترمنځ په لومړۍ شل آوریزه لوبه کي هم هندوستان بریا خپله کړې وه او په ۶ ویکیټو ئې کوربه نیوزیلینډ ته ماته ورکړې وه.

ټاکل سوې دا دوه هیوادونه د لړۍ درېیمه لوبه د راتلونکي چهارشنبې په ورځ ترسره کړي.

هندوستان تر نیوزیلینډ مخکي په خپل کوربتوب د درو شل آوریزه سیالیو لړۍ د سریلانکا سره هم ترسره کړه، چي یاده لړۍ ئې د هغه هیواد څخه وګټله.

د لیکوال/ لیکوالې په اړه

محمد صابر حمیدي ، کندهار کې د یاران د کاري ټیم غړی

محمد صابر حمیدي په کندهار کې د یاران د کاري ټیم غړی دی. نوموړی پر دې سربیره د کندهار پوهنتون د ښووني او روزنې پوهنځی د پښتو څانګې د څلورم کال محصل دی او د ” زما“ راډیو خبري برخه کې کار کوي. صابر د فوټبال لوبغاړی دی. یاران ته په سپورټي، ټولنیزو او نورو برخو کې لیکنې او مطالب چمتو کوي. په یاران کې د نوموړي د ټولو لیکنو د بیا خپرولو حق له یاران سره خوندي دی.

تبصره مو ولیکئ