فبروري 28, 2021

نن هند او ویسټ انډيز دوهمه شل آوریزه لوبه ترسره کوي

د هندوستان او ویسټ انډيز کرکیټ ملي لوبډلو ترمنځ د هندوستان په کوربتوب د درو شل آوریزه سیالیو د لړۍ څخه ئې نن یکشنبه دوهمه شل آوریزه لوبه ترسره کیږي.
دا لوبه نن ماښام ۶ بجې پېلیږي.
د هند او ویسټ انډیز ترمنځ تر دې مخکي د درو شل آوریزه لوبو د لړۍ لومړۍ لوبه تېره جمعې ورځ ترسره سوه، چي په هغه کي هند په ۶ ویکیټو بریا خپله کړه.

په یاده لوبه کي لومړی ویسټ انډیز توپوهنه وکړه، ویسټ انډیز په ټاکلو شل آورونو کي د ۵ لوبغاړو په سوځېدو سره هندوستان ته د ۲۰۸ منډو هدف وټاکی.

کله چي هندۍ لوبډله د توپوهني لپاره میدان ته کښته سوه د ویسټ انډیز له لوري ورکړل سوی هدف ئې د لوبي په ۱۸،۴ آورونو کي د ۴ لوبغاړو په سوځېدو سره پوره کړ.

د هند لپاره لوبډلمشر ویراټ کوهلي ۹۴ ناسوځېدلي، لوکیش راهول ۶۲ او ریشپ پنټ بیا ۱۸ منډي جوړي کړې.
د یادي لوبي غوره لوبغاړی د هند لوبډلي لوبډلمشر ویراټ کوهلي وټاکل سو، هغه د خپلي لوبډلي لپاره ۹۴ تیزي ناسوځېدلي منډي جوړي کړې.

هند او ویسټ انډیز ټیمونه بیا درېیمه او د لړۍ وروستۍ شل آوریزه لوبه راتلونکې چهارشنبه ترسره کوي.

د یادو درو شل آوریزه سیالیو وروسته د هند او ویسټ انډیز کرکیټ ملي لوبډلو ترمنځ درې یو ورځنۍ لوبي هم د هند په کورتبوب ترسره کیږي.
د یادي لړۍ لومړۍ یو ورځنۍ لوبه د رواني ډیسمبر میاشتي په ۱۵مه، دوهمه په ۱۸مه او درېیمه یو ورځنۍ لوبه بیا د رواني ډيسمبر میاشتي په ۲۲مه نېټه ترسره کیږي.