Advertisements
سپورټ فوټبال

نن افغان فوټبال لوبډله خورا سخته لوبه لري!

ليکنه: صابرحميدي

د افغانستان فوټبال ملي لوبډله نن سې شنبه ماښام ۶ نیمي بجې د قطر هیواد فوټبال ملي لوبډلي سره د افغانستان په کوربتوب تاجکستان هیواد دوشنبې ښار کي لوبیږي.

دا لوبه د ۲۰۲۲م کال د فوټبال نړیوال جام او د ۲۰۲۳م کال د آسیا ملتونو جام ته د لاري پيداکولو په موخه ترسره کیږي، چي په دې سیالیو کي دا د افغانستان پنځمه لوبه ده.

افغان فوټبال لوبډلي په دې سیالیو کي خپله څلورمه لوبه کي تېره شنبه د هند فوټبال لوبډلي په وړاندي ترسره کړه، چي یو ګول په مقابل کي د یو ګول په مساوي ډول پای ته ورسېده.

یاده لوبه چي تر ډېره د افغان لوبغاړو په واک کي وه، د لوبي په لومړۍ نیمایي کي افغان لوبډلي ۱ ګول د هند ملي لوبډلي ته ورکړ.

کله چي دوهمه نیمایي پیل سوه هند ملي لوبډلي د ګولوهني لپاره لا خپلي هڅي زیاتي کړې، خو افغان لوبغاړو هندۍ لوبډله دې ته پرینښوده چي د لوبي تر ۹۱یمي دقیقې پوري ګولوهنه وکړي.

وروسته د لوبي په اخیري شېبو ۹۲یمه دقیقه کي هند ـ افغانستان ته د کارنر له لاري ګول وواهه او لوبه ئې مساوي کړه.

د ۲۰۲۲م کال د فوټبال نړیوال جام او د ۲۰۲۳م کال د آسیا ملتونو جام ته د لاري پيداکولو په موخه افغان لوبډله یوار مخکي هم د قطر هیواد سره مخ سوې وه، چي قطر ۶ ګولونه پر ۰ افغانستان ته ماته ورکړې وه.

په دوهمه لوبه کي افغانانو بنګله دېش ته ۱ ګول پر ۰ ماته ورکړه، خو په درېیمه لوبه کي ئې بیا د عُمان څخه ۳ ګولونه پر ۰ ماته ورکړه.

افغان فوټبال لوبډله د دې سیالیو په ۵ ګروپ کي د قطر، بنګله دېش، عمان او هند لوبډلي سره شتون لري.

په یاد ګروپ کي قطر لومړی، عمان دوهم، افغانستان درېیم، هند څلورم او بنګله دېش بیا پنځم ځای لري.

Advertisements

د لیکوال/ لیکوالې په اړه

محمد صابر حمیدي ، کندهار کې د یاران د کاري ټیم غړی

محمد صابر حمیدي په کندهار کې د یاران د کاري ټیم غړی دی. نوموړی پر دې سربیره د کندهار پوهنتون د ښووني او روزنې پوهنځی د پښتو څانګې د څلورم کال محصل دی او د ” زما“ راډیو خبري برخه کې کار کوي. صابر د فوټبال لوبغاړی دی. یاران ته په سپورټي، ټولنیزو او نورو برخو کې لیکنې او مطالب چمتو کوي. په یاران کې د نوموړي د ټولو لیکنو د بیا خپرولو حق له یاران سره خوندي دی.