اپریل 23, 2021

ننګرهار کې یو نوی زېږېدلی ماشوم د تښتوونکو له منګولو ژغورل شوی

د ننګرهار چارواکي وایي، د دغه ولایت په خوږیاڼو ولسوالۍ کې یو نوی زېږدلی ماشوم تښتول شوی و چې بېرته پولیسو د تښتوونکو له منګولو ژغورلی دی.

د ننګرهار ولایت رسنیز دفتر وایي، د دغه ولایت د خوږياڼو ولسوالۍ له روغتون څخه يو نوی زيږيدلی ماشوم چې يوې مېرمنې له لوري تښتولی شوی و، پولیسو له لوري د تښتونکې له منګولو خلاص او خپلې کورنۍ ته وسپارل شو.

خبرپاڼه کاږې، د معلوماتو له مخې هغه مېرمن چې ماشوم يې تښتولی و اصلي د پچير اګام ولسوالۍ اوسيدونکې ده، چې اوسمهال د خيبر پښتونخوا په چارصدې سيمه کې ژوند کوي، له نوموړې څخه څېړنې روانې دي.

دغه مېرمن وایي، دولس کاله مې د واده کېږي خو ماشومان مې نه لرل، مجبوره شوم چې پردی ماشوم وتښتوم.

نوموړې زیاته کړې، خاوند او کورنۍ یې ترې ماشوم غوښته نو د مجبوریت له امله یې پردی ماشوم پټ کړی دی.

په ورته وخت کې د ننګرهار د امنیه قومندانۍ ویاند فرید خان ویلي، ماشوم یې خپلې کورنۍ ته روغ رمټ سپارلی دی.

یاده پیښه داسې مهال رامنځته کېږي چې د هیواد په ډېری سیمو کې ښځې د کورنیو لخوا د ماشوم نه راوړلو په صورت کې ورته جرمونو ته مجبوره کېږي.

لومړي کس و اوسه چې پر دې لیکنه نظر لیکي

نظر مو ولیکئ

ستاسو د ایمیل پته نه خپریږي




وروستي مطالب