ننګرهار کې د غني خېلو د شپږو لېسو زده کوونکو ته د کرکټ توکي ورکړل شول.

سمیع الله درانی
د ننګرهار ولایت په غني خېلو او اچین ولسوالیو کې د شپږو ښوونځیو سلو (۱۰۰) زده کوونکو ته د کرکټ سل جوړه لباسونه، سل جوړه بوټان، لس بېټونه، وېکټې او اړوند توکي ووېشل شول.
دغه مرسته د سپین غر زون کرکټ بورډ د ویاند فضل الرحیم رحیمي په شتون کې د افغانستان د کرکټ نړیوال لوبڅار بسم الله جان شینواري په لاسونو د چهارشنبې په ورځ د اکټوبر په دوهمه نېټه په یادو لېسو کې ورکړل شوه.
دا مرسته د افغان نولس کلنو ملي لوبډلې د روزونکي رئیس احمدزي په هلو ځلو د افغان کنېکشن مخابراتي او انټرنېټي شرکت له خوا سپانسر شوې وه.
بسم الله جان شینواري، یاران وېب پاڼې ته وویل، چې دا مرسته د افغان کنېکشن شرکت له خوا رئیس احمدزي ته ورکړل شوې وه؛ چې هغه د ده په لاسونو د شینوارو سل زده کوونکو ته ور ورسوله.
شینواری وایي « د دې توکو ارزښت په دې کې دی، چې ورسره د ښوونځیو د کچې کرکټ تشویق شي، له ښاره وتلو کلیوالو ساحو کې هم مینوال لوبغاړي ولوبېږي او د افغانستان کرکټ ورسره ښه کېدلای شي».
بسم الله جان وایي ختیځه سیمه کې کرکټ پراخه او پیاوړی دی او ننګرهار بیا د کرکټ کور دی؛ دلته د کرکټ لوبو ښه لوبغاړي شته او پېداکېدای شي؛ نو ځکه په دې برخه کې ډېره پاملرنه باید ختیځ ته وشي، دی وایي زده کوونکي د دوی له مرستو خوښ دي او د نورو مرستو غوښتنه هم کوي.
دا په شینوارو کې لومړی اقدام دی، چې د افغان کنېکشن په مالي مرسته د رئیس احمدزي، بسم الله جان شینواري او د سپین غر زون کرکټ بورډ په شتون کې ترسره کېږي.
په ننګرهار کې اوس کرکټ لا په پراخېدو دی، دلته په جلال اباد ښار او شا او خوا سیمو کې د ګوتو په شمار کرکټ اکاډُمیانې فعالیت کوي؛ خو په کلیوالو سیمو کې د کرکټ سیمه یز کرکټ مینوال او لوبغاړي خورا زیات دي، چې ښوونځي یې هم د کرکټ لوبډلې لري، دا چې د ښوونځیو په کچه کرکټ ښه سمبال شي؛ نو په راتلونکي کې له کلیوالو ښوونځیو وړ لوبغاړي راټولېدای او هېوادنۍ لوبډلې پرې پیاوړې کېدای شي.

په هلمند کې تازه جګړو له ۹۰۰زیاتې کورنۍ بې کوره کړي

لیکوال: ياران، جلال اباد - برخه : افغانستان

لیکنه: ظریف الله ساحل د هلمند د کډوالو او راستنېدونکو چارو رئیس وايي’ له تېرې یکشنبې د تازه جګړو له کبله په سلګونو کورنۍ د هلمند بېلابېلو برخو ته کډه شوي دي. سید محمد رامین ... نور ولولئ