سپورټ فوټبال

میسي شپږم د سرو زرو توپ ترلاسه کړ.

ليکنه: صابرحميدي

د بارسلونا کلب تکړه لوبغاړی لیونل میسي په روان ۲۰۱۹م کال کي تر رونالډو او فن ډایک غوره لوبغاړی وپېژندل سو او د فرانسې فوټبال له لوري ورته د سرو زرو توپ ورکړل سو.

په دې سره میسي د زیاتو سرو زرو توپونو په خپلولو سره ریکارډ جوړ کړ، تر دې مخکي هیڅ لوبغاړی ندی توانېدلی، چي په دومره شمېر سره د سرو زرو توپونه خپل کړي.

د سرو زرو توپ ته لیونل میسي، کریسټیانو رونالډو او ویرجیل فن ډایک نوماندان وه، چي میسي ئې ګټونکی سو، خو فن دایک په دوهم او رونالډو بیا په دریم قطار کی راغی.

لیونل میسي پرون ناوخته د شپږم سرو زرو توپ ترلاسه کولو وروسته جوړو سوو مراسمو کي وویل ((د هغو ټولو څخه ډېره مننه، چي ددې جایزي په انتخاب کي ئې ماته رایه راکړې ده. د خپل کلب د مسئولینو او لوبغاړو او همداشان د خپل هیوادني ټیم آرجنټاین څخه ډېره مننه کوم، چي زما د پرمختګ لپاره ئې ډېر څه کړي دي))

میسي زیاته کړه(( لس کاله مخکي مي دلته لومړنی توپ ترلاسه کړ او نن دا دئ شپږم د سرو زرو توپ مي ترلاسه کړ. د ژوند خاصي شیبې تیروم. د خپلو وړتیاوو څخه لاس نه اخلم او ډېر تمرکز مي پر همدې دئ، چي همداسي روان اوسم))

میسي د خپل راتلونکي په اړه وویل(( څو کاله زما د لوبو پاته دي، خو د فوټبال د لیري والي څخه مي وختونه ډېر رانژدې سوي او هر سه په ډیري تېزۍ سره پر مخ روان دي. غواړم د خپلي کورنۍ ترڅنګ فوټبال ته دوام ورکړم او خوند ځني واخلم))

میسي د لومړي ځل لپاره دا جایزه په ۲۰۰۹ کال، دوهمه په ۲۰۱۰، درېیمه په ۲۰۱۱، څلورمه په ۲۰۱۲، پنځمه په ۲۰۱۵ او شپږمه ئې بیا دا دی تېره شپه ترلاسه کړه.

تر میسي وروسته د نړۍ بل تکړه لوبغاړي رونالډو دا جایزه ۵ ځلي خپله کړې.

د سرو زرو توپ د ۱۹۵۶م کال را پدېخوا هر کال د فرانس مجلي لخوا د کال غوره لوبغاړي ته ورکول کیږي.

د لیکوال/ لیکوالې په اړه

محمد صابر حمیدي ، کندهار کې د یاران د کاري ټیم غړی

محمد صابر حمیدي په کندهار کې د یاران د کاري ټیم غړی دی. نوموړې پر دې سربیره د کندهار ولایت د ښوونې او روزنې د پوهنتون د پښتو څانګې د څلورم کال محصل دی او د ” زما“ راډیو خبري برخه کې کار کوي. صابر د فوټبال لوبغاړی دی. یاران ته په سپورټي، ټولنیزو او نورو برخو کې لیکنې او مطالب چمتو کوي. په یاران کې د نوموړي د ټولو لیکنو د بیا خپرولو حق له یاران سره خوندي دی.