قطر: د کابل هوایي ډګر د پاتې برخو رغولو ته چمتو یو

قطر د کابل هوایي ډګر د پاتې برخو رغولو او فعالولو ته لیوالتیا ښودلې ده.

د یاد هېواد د بهرنیو چارو وزیر شیخ محمد عبدالرحمن الثاني ویلي چې که چېرته د ا.ا.ا چمتو وي نو هېواد یې د کابل هوایي ډګر د پاتې برخو رغولو او فعالولو ته تیار دی.

نوموړي د مدیتراني په نامه خبرو اترو ته په انلاین خبرو کې ویلي چې قطر د ترکیې په همکارۍ غواړي چې د کابل هوایي ډګر بېرته ترمیم او مجهز کړي.

د افغانستان اسلامي امارت تر اوسه په دې اړه څه نه دي ویلي خو مخکې تر دې یې په وار وار د بهرنیو هېوادونو له نظامي حضور پرته د هغوی د هر ډول همکاریو هرکلی کړی دی.

په ورته وخت کې د قطر د بهرنیو چارو وزیر ویلي چې د افغانستان ثبات د ټولې سیمې لپاره مهم دی خو له بده مرغه چې نړیواله ټولنه ددغه هېواد د پرمختګ او ثبات لپاره یو مشخص پلان نه لري.

محمد بن عبدالرحمن ویلي چې دوی لا هم په افغانستان کې د ثبات لپاره د سیمه ییزو هېوادونو له سیاسي مشرانو سره خبرې کوي او غواړي د دوی اندېښنې رفع کړي.

نوموړي په افغانستان کې د روان وضعیت په اړه د روسیې، چین او ځينو نورو هېوادونو اندېښنې پر ځای بللې دي او په وینا یې که د سیمې هېوادونه همکاري وکړي نو له افغانستان به هېچا ته هم ګواښ جوړ نه شي.

هغه یو ځل بیا ټینګار کړی چې له ترکیې سره د کابل هوایي ډګر پر فعالولو او امنیت د دوی خبرې روانې دي او ژر به یوې پایلې ته ورسېږي.

About عاقله اسد 1244 Articles
په کابل کې د یاران خبریاله