مارچ 5, 2021

عبدالسمیع فیضي له هیوادوالو ګیله کړې!

د افغانستان د آزادي مبارزې تکړه لوبغاړي عبدالسمیع فیضي پر خپلي رسمي فیسبوک پاڼه د افغان مشرانو او ټولو افغانانو څخه د لوبي ژوندۍ نه خپرولو او نه ستایني له امله ګیله کړې.

هغه ویلي، چي ما څو ورځي مخکي د MMA په یوه لویه لوبه کي خپل سخت سیال ته ماته ورکړه، خو نه افغان چارواکو او نه هم هیڅ افغان وستایلم، خو د صفري یوه کوچنۍ لوبه ګټل ولسمشرۍ ماڼۍ لا وستایه.

پرون شنبه د افغانستان د آزادي مبارزې وتلي لوبغاړي حسین بخش صفري په روسیه کي روسي لوبغاړي پیتربرګ ته ماته ورکړه او د یادي لوبي ګټونکی اعلان سو.

حسین بخش صفري تر یادي لوبي ګټلو وروسته پر ټولنیزو رسنیو د ګڼو افغانانو ترڅنګ ولسمشرۍ ماڼۍ هم وستایه او دې افغان لوبغاړي ته ئې د بریا مبارکي وویله.

خو عبدالسمیع فیضي پر خپلي رسمي فیسبوک پاڼه لیکلي(( هیله کوم ږغ مي خپور کړی، تر څو بې اتفاقه مشرانو ته ورسیږي. ټول قومونه په ژوندون باندي درانه شي، پښتانه چي کله مړه شي بیا درانه شي)).

هغه د دې ترڅنګ لیکلي(( زما د تیري لوبي سطحه ډېره لوړه وه، تر اوسه د افغانستان دننه د MMA لوبغاړو کي هغه سي پياوړي سیال سره لوبه چا نده کړې، خو نه چا لایف خپره کړه او نه هم چا وستایلم)).

ښاغلي فیضي د دې ترڅنګ لیکلي((نن ګورم، چي رئيس جمهور زموږ هزاره ورور بریا وستایل شوه او مبارکي ورکول شوه، آیا دا زما حق نه وو؟ افسوس افسوس)).

د افغانستان د آزادي مبارزې دې قوي لوبغاړي په آخر کي حسین بخش صفري ته د بریا مبارکي ورکړې.