سپورټ

شفیق الله غفاري د لوبي د غوره لوبغاړي جایزه خپل مور او پلار ته ډالۍ کړه.

پرون جمعه د ۱۹ کلنو ترمنځ د کرکیټ نړیوال جام سیالۍ پيل سوې، چي پکښي افغان لوبډلي د ۷ ویکیټو په توپير کوربه سویلي افریقا ته سخته ماته ورکړه.

په یاده لوبه کي د افغان لوبډلي لپاره سلو توپ اچونکي شفیق الله غفاري د سویلي افریقا ۶ لوبغاړي وسوځول او د لوبي د غوره لوبغاړي جایزه ورکړل سوه.

تر لوبي وروسته شفیق الله غفاري وویل، چي د لوبي د ګټلو او د غوره لوبغاړي پر ټاکل کېدو ډېر خوشحاله یم او زه د ننۍ لوبي د غوره لوبغاړي ټاکل کېدو ایوارډ یا جایزه خپل مور او پلار ته ډالۍ کوم.

غفاري زیاته کړه دا جایزه ځکه مور او پلار ته ډالۍ کوم، چي تل ئې زما ملاتړ کړی، زه ئې تل ستایلی یم او تل ئې راته د ښه لوبېدو دعاوي کړي دي.

هغه وویل((۶ ویکیټي اخیستل په داسي لوبو کي اسانه خبره نده، ما د پلان مطابق توپ اچونه وکړه او پکښي بریالی هم سوم، زه د یادي لوبي د غوره لوبغاړي ایوارډ خپل مور او پلار ته ډالۍ کوم)).

هغه د خپلي توپ اچوني په اړه وویل((د سویلي افریقا په وړاندي لوبه کي ګوګلي توپ اچونه خورا ښه تمامېده، چي ما هم وکړه او خورا ښه تمامه سوه، چي له امله مي ویکیټي واخیستې، زه د راشد خان د ګوګلي څخه ډېر متاثره یم او تل هڅه کوم د هغه په څېر ګوګلي وغورځوم)).

پرون جمعه د سویلي افریقا په کوربتوب د ۱۶ هیوادونو ترمنځ د ۱۹ کلنو نړیوال جام پيل سو، چي د پیل په لوبه کي افغان لوبډلي سویلي افریقا ته ماته ورکړه.

افغان ۱۹ کلنه لوبډله به خپله دوهمه لوبه راتلونکې چهارشنبه د متحده عربي آماراتو په وړاندي او درېیمه لوبه بیا د راتلونکي جمعې په ورځ د کاناډا په وړاندي ترسره کړي.

 

 

د لیکوال/ لیکوالې په اړه

محمد صابر حمیدي ، کندهار

محمد صابر حمیدي په کندهار کې د یاران د کاري ټیم غړی دی. نوموړی د کندهار پوهنتون د ښووني او روزنې پوهنځی د پښتو څانګې څخه فارغ شوی. په کندهار کې د ” زما“ راډیو سره په خبري برخه کې کار کوي. صابر د فوټبال لوبغاړی دی. یاران ته په سپورټي، ټولنیزو او نورو برخو کې لیکنې او مطالب چمتو کوي. په یاران کې د نوموړي د ټولو لیکنو د بیا خپرولو حق له یاران سره خوندي دی.