سپورټ

سبا افغان ۱۹ کلنه لوبډله په قوي مرال د متحده عربي آماراتو سره لوبیږي

د افغانستان د کرکیټ ۱۹ کلنه ملي لوبډلي د ۱۹ کلنو ترمنځ په نړیوال جام کي خپله دوهمه لوبه سبا د چهارشنبې په ورځ د متحده عربي آماراتو په وړاندي ترسره کوي.

دا لوبه د سویلي افریقا په پوچیفسټروم ښار کي سبا د چهارشبنې په ورځ غارمه ۱۲:۳۰ بجې پېلیږي.

دا په نړیوال جام کي د افغانانو دوهمه لوبه ده. افغان لوبډلي تر دې مخکي د تیري جمعې په ورځ خپله لومړۍ لوبه د کوربه سویلي افریقا څخه وګټله.

په هغه لوبه کي افغانانو ته سویلي افریقا د ۱۳۰ منډو هدف وټاکه او افغان لوبډلي د ۳ ویکیټو په تاوان پوره کړ او کوربه سویلي افریقا ته ئې په ۷ ویکیټو سخته ماته ورکړه.

د یاد لوبي غوره لوبغاړی سلو توپ اچونکی شفیق الله غفاري ټاکل سوی وو، هغه د افغان ټيم لپاره د سويلي افریقا ۶ لوبغاړي وسوځول.

په سبانۍ لوبه کي به ځکه د افغان کرکیټ ملي لوبډلي مرال قوي او زورو وي، ځکه دوی په خپله لومړۍ لوبه کي کوربه هیواد ته سخته ماته ورکړې ده.

یوه هیواد ته په خپل کوربتوب ماته ورکول خورا سخته وي، په تېره بیا د سویلي افریقا په څېر هیوادونه.

تر یادي بریا وروسته په داخلي او نړیواله کچه ګڼ شمېر کرکیټ پوهانو د افغان ۱۹ کلنو لوبغاړو ستاینه په هرخه برخه کي وکړه.

افغان کرکیټ بورډ وايي، چي افغان ۱۹ کلنه لوبډله به د متحده عربي آماراتو وروسته خپله درېیمه او د ګروپ وروستۍ لوبه راتلونکې جمعه د کاناډا په وړاندي ترسره کړي.

د ۱۹ کلنو ترمنځ د کرکیټ دا نړیوال جام، چي ۱۶ هیوادونه پکښي ګډونوال دي د تیري جمعې په ورځ د سویلي افریقا په کوربتوب پيل سو او د راتلونکي فیبروري میاشتي تر ۹همي نېټې پوري به دوام وکړي.

 

د لیکوال/ لیکوالې په اړه

محمد صابر حمیدي ، کندهار

محمد صابر حمیدي په کندهار کې د یاران د کاري ټیم غړی دی. نوموړی د کندهار پوهنتون د ښووني او روزنې پوهنځی د پښتو څانګې څخه فارغ شوی. په کندهار کې د ” زما“ راډیو سره په خبري برخه کې کار کوي. صابر د فوټبال لوبغاړی دی. یاران ته په سپورټي، ټولنیزو او نورو برخو کې لیکنې او مطالب چمتو کوي. په یاران کې د نوموړي د ټولو لیکنو د بیا خپرولو حق له یاران سره خوندي دی.