د کورش لوبي ملي لوبډله قزاقستان ته ولاړه

د مسئولینو په خبره د افغانستان د کورش لوبي ملي ټيم په نړیوالو لوبو کي د ګډون په موخه پرون سې شنبه قزاقستان هیواد ته ولاړ.

د کورش دا نړیوالي لوبي نن د ډیسمبر په ۱۱مه نېټه د قزاقستان په کوربتوب پيلیږي او تر ۷ ورځو دوام وروسته د رواني ډیسمبر میاشتي په ۱۷مه نېټه پای ته رسیږي.
په دې نړیوالو لوبو کي د افغانستان په ګډون د نړۍ د ۶۱ هیوادونو څخه د کورش لوبي لوبغاړي ګډون کوي.
ټاکل سوې په دې سیالیو کي ۴ نارینه افغان لوبغاړي په بیلابیلو وزني کټګوریو کي د خپلو سیلانو په وړاندي میدان ته کښته سي او سیالۍ ترسره کړي.

پرون د سې شنبې په ورځ د یادو ۴ افغان لوبغاړو سره قزاقستان هیواد ته تر سفر مخکي د المپیک د ملي کمېټې تخنیکي مرستیال حمیدالله کبیر ولیدله.

حمیدالله کبیر یادو افغان لوبغاړو ته د کورش په نړیوالو لوبو کي د ښه ځلېدو هیله وښوده او د هر ډول همکاریو ډاډ ئې ورکړ.