سپورټ وزش او تمرین

د کراټې افغان لوبغاړو ایران کي مډالونه ګټلي.

ليکنه: صابرحميدي

د افغانستان د کراټې ملي لوبډلي د ایران په کوربتوب د ګلستان کپ په لومړي پړاو سیالیو کي درې بیلابیل مډالونه ګټلي او د یادو مډالونو په ګټلو سره ئې درېیم مقام خپل کړی.

د ورکړل سوو معلوماتو له مخي، چي افغان لوبغاړو په یادو سیالیو کي دوه د سرو زرو او یو بیا د سپینو زرو مډال ترلاسه کړ.

د افغانستان د المپيک ملي کمېټې پر رسمي فیسبوک پاڼه راغلي، چي یاد درې واړه مډالونه د افغان لوبډلي لپاره کاظم علیخاني، مهران واحدي او خیرالله واحدي ګټلي.

دا لوبي د ایران په ګلستان ښار کي تېره پنجشنبه پيل سوي وې او پرون شنبه پاي ته ورسېدې.

په دې سیالیو کي د افغانستان، روسیې، عراق، ترکیې، آذربایجان، ګرجستان، نخجوان، کردستان عراق او ارمنستان هیواد سربیره د ایران څخه ۲۰ لوبډلو ګډون کړی وو.

په دې سیالیو کي د افغانستان څخه ۱۰ لوبغاړو سیالۍ ترسره کړې، چي څلورو د ځوانانو په کټګوري کي او شپږو بیا د لویانو په کټګوري کي لوبي ترسري کړې.

دا لومړۍ ځل وو چي د ګلستان کپ په نوم د کراټې نړیوالي لوبي د ایران په کوربتوب ترسره سوې، چي پکښي کوربه ایران لومړی، عراق دوهم، افغانستان درېیم، آذربایجان څلورم او ارمنستان بیا پنځم مقام خپل کړ.

د لیکوال/ لیکوالې په اړه

محمد صابر حمیدي ، کندهار کې د یاران د کاري ټیم غړی

محمد صابر حمیدي په کندهار کې د یاران د کاري ټیم غړی دی. نوموړې پر دې سربیره د کندهار ولایت د ښوونې او روزنې د پوهنتون د پښتو څانګې د څلورم کال محصل دی او د ” زما“ راډیو خبري برخه کې کار کوي. صابر د فوټبال لوبغاړی دی. یاران ته په سپورټي، ټولنیزو او نورو برخو کې لیکنې او مطالب چمتو کوي. په یاران کې د نوموړي د ټولو لیکنو د بیا خپرولو حق له یاران سره خوندي دی.