د تیري پنجشنبې په ورځ د هیواد په اتو زونونو کي د اتو اتلو لوبډلو ترمنځ په کابل ولایت کي د فوټبال ټورنمنټ پيل سو، چي د هلمند لیسه ذکور لوبډلي پکښي د دوو بریاوو او یوې ماتي په خوړلو سره نیمه پایلوبي ته لاره پيداکړه.
په یادو سیالیو کي د سویلي حوزې څخه د هلمند لیسه ذکور لوبډلي ګډون کړی، چي د لومړۍ لوبډلي په توګه ئې نیمه پایلوبي ته لاره پيداکړه.
دې لوبډلي د یادو سیالیو په لومړي پړاو(ګروپ) کي خپله لومړۍ لوبه د هرات اټک انرژي ته ۲ ګولونه پر ۱ وبایلله، خو په دوهمه لوبه کي ئې د ننګرهار جوانان وفا ټيم ته ۷ ګولونه پر ۱ سخته ماته ورکړه او دادی نن دوشنبه ئې بیا تر غرمې مخکي د کابل تکړه ټیم اُردو ته ۲ ګولونه پر ۱ ماته ورکړه.
په دې سره د هلمند لیسه ذکور فوټبال ټيم نیمه پایلوبي ته لاره پیداکړه.
د دې لوبډلي تر څنګ نن مازدیګر د هرات اټک انرژي لوبډلي د دوهم ټیم په توګه نیمه پایلوبي ته ووت.
سبا سې شنبه د یادو سیالیو د لومړي پړاو په وروستیو دوو لوبو کي د بدخشان ولایت عقاب پامیر د پنجشېر پیروزي ټيم په وړاندي او د لوګر اتحاد لوبډله به بیا د فاریاب د خراسان ټيم سره ولوبیږي.
سبا سې شنبه دوې لوبډلي نوري هم څرګندیږي، چي دوهم پړاو یا نیمه پایلوبي ته به لاره ومومي.
د راتلونکي پنجشنبې په ورځ بیا د یادو سیالیو نیمه پایلوبي ترسره کیږي او راتلونکې اونۍ کي بیا د یادو سیالیو پایلوبه ترسره کیږي.
یادو لوبډلو لومړی په خپل زون کي د میشتو ولایتونو ترمنځ د فوټبال سیالۍ ترسره کړې، چي په لومړي مقام ګټلو سره ئې یادو سیالیو ته لاره پيداکړه.
د زونونو ترمنځ د قهرمانۍ په نوم د فوټبال دا سیالۍ هر کال په کابل کي ترسره کیږي.
تېر کال بیا په یاد ټورنمنټ کي د هرات سرخ پوشانو د کابل سرې میاشتي ته په ماتي ورکولو سره اتلولي خپله کړه.
