ليکنه: سمیع الله درانی
د افغان کرکټ بورډ ادارې نن د پنجشنبې په ورځ د سپټمبر په ۱۲ مه نېټه د افغانستان شل اوریز غوره لیګ قضیه د فساد تورونو د څېړنې په موخه څارنوالۍ ته وړاندې کړه او همدا راز یې له سنېکسر سپورټس (SnixerSports) کمپنۍ سره قرارداد فسخه کړ.
افغان کرکټ بورډ له سنېکسر کمپنۍ سره یاد قرارداد د تېر کال د کلني فیس د نه ورکړې او د لیګ چارو په روڼتیا کې د شته اندېښنو له امله فسخ کړ؛ د قرارداد پر بنسټ ټاکل شوې وه چې سنېکسر سپورټس به افغانستان کرکټ بورډ ته د لیګ د لومړي پړاو ټول فیس د لیګ د پای ته رسېدو ۱۵ ورځې وروسته ورکړي، چې د نهو میاشتو په تېرېدو سره بیا هم نه دی ورکړل شوی.
همدارنګه په دې موخه، څو د یادې قضیې داخلي اړخ هم وڅېړل شي نو د افغانستان کرکټ بورډ ادارې غوره وبلله، د لا ډېرو څېړنو په موخه قضیه د لویې څارنوالۍ عالي ادارې ته ولېږي، ترڅو د قضیې ټول اړخونه په مسلکي او روڼ ډول وڅېړل شي.
د کرکټ بورډ له لوري سنېکسر سپورټس کمپنۍ ته د قرارداد د فسخ کولو په موخه لېږل شوی، خبرتیا کې هم ویل شوي چې د پورته دوه مواردو پر بنسټ یې دغه قرارداد له منځه وړی دی.
د یادونې وړ ده چې له یادې کمپنۍ سره د قرارداد د فسخې د شرایطو پر بنسټ، د افغانستان کرکت بورډ دا حق لري چې د پورته سرغړونو له امله قرارداد فسخ اعلان کړي.
سربېره پر دې باید یادونه وشي چې د افغانستان شل اوریز غوره لیګ دویم پړاو تر راتلونکي کال وځنډول شو او په راتلونکي کې به د افغانستان شل اوریز غوره لیګ امتیاز ترلاسه کولو ټولې چارې د ازادې سیالۍ له مخې ترسره شي.
د افغانستان شل اوریز غوره لیګ لومړی پړاو لوبې تېر کال په متحده عربي اماراتو کې د پنځو لوبډلو ترمنځ ترسره شوې چې د بلخ لیجېنډز لوبډلې پکې اتلولي خپله کړې وه.
داسې ویل کېږي، چې دغه لیګ کې شا او خوا ۱۴ لکه ډالر درغلي شوې ده.
