سپورټ فوټبال

د لالیګا رئیس: لالیګا کي د میسي شتون د نیمار او رونالډو په پرتله ډېر ارزښت لري

ليکنه: صابرحميدي

د اسپانیا هیواد د فوټبال لومړی درجه لیګ لالیګا دئ، چي د بارسلونا، ریال ماډریډ او اتلاتیک ماډریډ په ګډون هر کال ۲۰ قوي لوبډلي یو د بل په وړاندي د تګ او راتګ په ډول لوبیږي.

د لالیګا لیګ رئیس خاویر تباس بارسلونا ته د نیمار پر بیا یو ځای کېدو خبري وکړې.

هغه وویل په لالیګا لیګ کي د برازیلي لوبغاړي نیمار شتون دومره ارزښت نلري لکه د ارجنټاین هبواد تکړه لوبغاړي میسي دا.

خاویر تباس د مارکا سره په خبرو کي د نیمار ترڅنګ د کریسټیانو رونالډو په اړه هم وویل، چي په لالیګا لیګ کي د رونالډو او نیمار دواړو شتون دومره ارزښت نلري لکه د لیونل میسي.

هغه وویل(( رونالډو او نیمار دومره ارزښت په لالیګا کي نلري لکه مسي، مګر زه خوشحاله کیږم، چي نیمار اسپانیې ته بیرته راوګرځي، هغه د نړۍ د درو قوي لوبغاړو څخه یو دئ، د هغه شتون په لالیګا کي مهم دی اما معلوم نقش به ونلري)).

هغه د خپلو خبرو په یو بل اړخ کي وویل((هغه څه چي معلوم لوری لري هغه دادی، چي په لس میاشتو کي هر کال ۲۰ اسپانوۍ لوبډلي یو د بل په وړاندي لوبیږي او هره اونۍ ئې ډېر مینوال په لوبغالي او ټلویزیونونو کي په ډېر شوق ګوري، د نیمار غوندي لوبغاړی د دې لامل کیږي، چي زیاتره خلګ د لالیګا لوبي وګوري، اما مهم عنصر د لالیګا لپاره ندی، حتا رونالډو هم مهم عناصر نه وو، مګر لیونل میسي زموږ لپاره یو مهم لوبغاړی دئ چون هغه د لالیګا میراث دئ)).

تباس په دې باور دئ، چي په لالیګا لیګ کي میسي د رونالډو او نیمار په پرتله ډېر ارزښت لري.

د اسپانیا هیواد لالیګا لیګ ۹۰ کاله مخکي تاسیس سوی، چي تر ټولو ډېر ریال ماډریډ توانېدلی د دې لیګ اتلولي خپله کړي.

دا لوبډله توانېدلې، چي ۳۳ ځلي په دې ټورنمنټ کي لومړی مقام خپل کړي.

بارسلونا ۲۶، اتلاتیک ماډریډ ۱۰، اتلاتیک بلباوو ۸، والینسیا ۶، ریال سویداد ۲ او ډیپورټیو لاکورنیا، سویا او ریال بیټیس بیا یو ـ یو ځلي په دې لیګ کي ځان اتلولۍ ته رسولی.

تېر ۸۸یم او ۸۷یم پړاونه بارسلونا په پرلپسې ډول خپل کړي.

د فوټبال دا لیګ د نورو هیوادونو ترڅنګ دلته افغانستان کي هم زیات شمېر مینوال لري او د شپې تر ناوخته یادي لوبي.

د لیکوال/ لیکوالې په اړه

محمد صابر حمیدي ، کندهار کې د یاران د کاري ټیم غړی

محمد صابر حمیدي په کندهار کې د یاران د کاري ټیم غړی دی. نوموړې پر دې سربیره د کندهار ولایت د ښوونې او روزنې د پوهنتون د پښتو څانګې د څلورم کال محصل دی او د ” زما“ راډیو خبري برخه کې کار کوي. صابر د فوټبال لوبغاړی دی. یاران ته په سپورټي، ټولنیزو او نورو برخو کې لیکنې او مطالب چمتو کوي. په یاران کې د نوموړي د ټولو لیکنو د بیا خپرولو حق له یاران سره خوندي دی.