سرسکالو نړیوال کرکټ

د رحمت شاه لپاره د ټېسټ لوبو په درجه بندۍ کې یو بل چانس!

سمیع الله درانی

رحمت شاه زرمتی چې په ټېسټ او یو ورځنیو لوبو کې د افغان لوبډلې مهم او ون ډاون لوبغاړی دی، په ډېری لوبو کې چې بخت ورسره یاري کړې، د افغانستان ملا یې تړلې او نړیدلې لوبه یې ورته بېرته را رغولې ده.

د ون ډاون لوبغاړي دنده هم همدا وي، چې له اوپننګ شڼېدلې او بې ثباته شوې لوبه بېرته باثباته کړي.

په هندوستان کې ویرات کولي ډېری وخت د رغوونکي رول لوبوي، په انګلستان کې جو روټ، په افریقا کې فاف ډوپلیسي، په نیوزیلېنډ کې کېن ویلیمسن او پاکستان کې بابراعظم.

دا ټول لوبغاړي د لوبډلې ماته شوې برخه رغوي.

رحمت شاه زرمتی چې د افغان لوبډلې پیاوړی توپ وهونکی دی او تل په دریم نمبر توپ وهنې ته راښکته کېږي، په ټېسټ لوبو کې ښه ثابت شوی دی.

رحمت شاه او ټېسټ لوبو رېنکېنګ یا درجه بندي

رحمت شاه له دې وړاندې دوه ټېسټ لوبې کړي دي، ۲۰۱۸ م کال اګسټ میاشت کې یې د هند خلاف دوه پاڼۍ توپ وهنه وکړه، په دې پاڼیو کې یې ټولې ۱۸ منډې کړي دي، چې یوه کې یې ۱۴ او بله کې یې ۴ منډې وکړې.

ورپسې د ۲۰۱۹ م کال مارچ په ۱۵ مه نېټه یې له ایرلېنډ سره دوهمه ټېسټ لوبه کې د افغانستان په ګټه ګډون وکړ.

په دې لوبه کې زرمتي په یوه پاڼۍ کې ۹۸ منډې او بله پاڼۍ کې یې ۷۶ منډې وکړې او د لوبې غوره لوبغاړی هم اعلان شو، افغان لوبډلې د زرمتي د ښې توپ وهنې له امله ایرلېنډ ته په ۷ وېکټو ماته ورکړه.

رحمت شاه له ایرلېنډ سره تر ځلېدلو وروسته لومړی افغان لوبغاړی شو، چې د ټېسټ لوبو د توپ وهونکو په درجه بندۍ کې یې نوم ولیکل شو او درې نوي یم ۹۳ مقام یې خپل کړ.

نوموړی اوس لومړی افغان توپ وهونکی شو، چې د یو بشپړ غړېتوب لرونکې لوبډلې پر وړاندې سلیزه وهي.

د بنګله دېش خلاف سلیزه یې له هغه سره مرسته کولای شي، چې په ټېسټ درجه بندۍ کې هغه تر اویا وو ۷۰ خانې پورې را ورسوي.

دا به د هغه لپاره یوه بله ستره لاسته راوړنه او د افغان ملت لپاره به د فخر ځای وي، چې یو افغان داسې کارنامه کوي.

له زرمتي سره خوا کې پخواني لوبډلمشر اصغر افغان هم ۹۲ منډې وکړې، چې هغه به هم د ټېسټ لوبو په درجه بندۍ لېست کې راڅرګند شي او دا به دوهم افغان لوبغاړی وي، چې د ټېسټ لوبو په درجه بندۍ کې یې نوم راځي.

راشدخان هم په وروستیو کې په زړه پورې توپ وهنه وکړه؛ هغه په ۶۱ توپونو د ۳ شپږیزو او دوه څلوریزو په مرسته ۵۱ منډې وکړې، ښایي چې د بالرانو د درجه بندۍ ترڅنګ د راشدخان نوم د ټېسټ لوبو په توپ وهونکو لېست کې رامعلوم شي.

افغان لوبډلې بنګله دېش ته په لومړۍ پاڼۍ توپ وهنه کې ۳۴۲ منډې وکړې.

محمد نبي او یمن احمدزي د بنګله دېش دوه پیلوونکي لوبغاړي سوځولي دي.

د لیکوال/ لیکوالې په اړه

سمیع الله درانی