مارچ 8, 2021

د حج اوقافو وزارت: د اسلامي همکاریو سازمان د اعلامیې هرکلی کوو

Advertisements

د حج اوقافو وزارت د اسلامي هېوادونو د همکاریو سازمان له هغې اعلامیې هر کلی کړی چې ویلي و په افغانستان کې باید ژر تر ژره روان تاوتریخوالی ودرول شي.

د حج او اوقافو وزیر محمد قاسم حلیمي ویلي، اسلامي هېوادونه او سازمانونه دې په افغانستان کې د جګړې له غندنې سره د دغه هېواد د سولې پروسې ملاتړ هم وکړي.

د یاد وزارت په وینا، ټولو نړېوالو اسلامي سازمانونو او هېوادونو په افغانستان کې روانه جګړه نامشروع بللې او د دې جګړې د ژر پای ته رسېدو غوښتنه یې کړې.

د محمد قاسم حلیمي په خبره، د اسلامي هېوادنو د همکاریو سازمان وروستۍ اعلامیې چې په افغانستان کې د روان تاوتریخوالي د پای ته رسېدو او د سولې په خبرو کې د چټکتیا غوښتنه کړې د دې ښکارندوی کوي چې د افغانستان جګړه قانوني صبغه نه لري.

د اسلامي هېوادونو د همکارۍ سازمان د یوې اعلامیې په خپرولو سره په افغانستان کې روان تاوتریخوالی د اندښنې وړ ښودلی او له افغان حکومت او طالبانو یې غوښتنه کړې چې ژر تر ژره دې روان تاوتریخوالی پای ته ورسوي او د سولې خبرې د چټکې کړي.

د اسلامي همکارۍ د سازمان عمومي منشي یوسف بن احمد العثیمین، د یو بیان په خپرولو سره په افغانستان کې د تاوتریخوالي د سمدستي بندیدو غوښتنه وکړه او د ټولو اړخونو څخه یې وغوښتل چې د سولې هڅو ته پاملرنه وکړي او په بین الافغاني خبرو کې د بریالیتوب د ترلاسه کېدو هڅه وکړي.

نوموړي یو ځل بیا افغانستان سره د سولې، امنیت او ودې پر لور د دې سازمان په همکارۍ ټینګار وکړ.

د مسلمانو عالمانو نړیوالې ټولنې هم د روانې اونۍ په پیل کې د یوې اعلامیې په خپرولو سره په افغانستان کې د علماو، د بشري حقونو د مدافعینو او مدني فعالانو هدفي وژنې وغندلې او پر ملکي وګړو باندې برید یې د ټولو آسماني ادیانو او نړیوالو قوانینو خلاف عمل وګاڼه.

لومړي کس و اوسه چې پر دې لیکنه نظر لیکي

نظر مو ولیکئ

ستاسو د ایمیل پته نه خپریږي