سپورټ وزش او تمرین

د باسکیټبال ویلچر ملي لوبډله ټایلینډ ته ولاړه.

ليکنه: صابرحميدي

د مسئولینو په خبره د افغانستان د باسکیټبال ویلچر ملي لوبډله، چي نارینه او ښځینه دواړه پکښي شامل دي د یو لړ مهمو سیالیو لپاره پرون سې شنبه ټایلینډ هیواد ته ولاړه.

دا لوبډله معلولین دي، چي پر ویلچر یا د معلولینو پر بایسکل د باسکیټبال لوبه ترسره کوي.

د افغانستان د المپيک ملي کمېټې د معلوماتو له مخي، چي افغان ویلچر باسکیټبال ملي لوبډله په دې موخه ټالینډ ته تللې، چي د ۲۰۲۰م کال د پارااُلمپيک سیالیو ته د لاري پیداکولو لپاره سیالۍ ترسره کړې.

د ۲۰۲۰م کال د پارا اُلمپيک سیالیو ته د لاري پیداکولو په موخه د معلولینو ترمنځ د باسکیټبال دا لوبي نن چهارشنبه پېلیږي او تر ۱۱ ورځو دوام وروسته د راتلونکي ډیسمبر میاشتي په ۷مه نېټه پای ته رسیږي.

دا لوبي د ټایلینډ هیواد په پاتایا ښار کي ترسره کیږی.

د ورکړل سوو معلوماتو له مخي، چي د افغانستان په ګډون د ۲۲ هیوادونو څخه په دې سیالیو کي د باسکیټبال معلول لوبغاړي ګډون کوي.

د یادولو وړ ده، چي د یادو سیالیو څخه به دوې لوبډلي د نارینه او دوې لوبډلي به بیا د ښځينه لوبغاړو څخه د پارا اُلمپيک سیالیو ته لاره پيداکړي.

د پارا اُلمپيک سیالۍ په راتلونکي ۲۰۲۰م کال کي د جاپان په توکیو ښار کي ترسره کیږي.

د لیکوال/ لیکوالې په اړه

محمد صابر حمیدي ، کندهار

محمد صابر حمیدي په کندهار کې د یاران د کاري ټیم غړی دی. نوموړی پر دې سربیره د کندهار پوهنتون د ښووني او روزنې پوهنځی د پښتو څانګې د څلورم کال محصل دی او د ” زما“ راډیو خبري برخه کې کار کوي. صابر د فوټبال لوبغاړی دی. یاران ته په سپورټي، ټولنیزو او نورو برخو کې لیکنې او مطالب چمتو کوي. په یاران کې د نوموړي د ټولو لیکنو د بیا خپرولو حق له یاران سره خوندي دی.