Advertisements
سپورټ فوټبال

د افغانستان فوټبال ته یو بل ویاړ!

ليکنه: صابرحميدي

د فیفا عمومي رئيس افغان فوټبال فدراسیون او طوفان هریرود ته د اتلولۍ مبارکي ویلې.

د فوټبال نړیوال فدراسیون مشر جیاني اینفانتینو افغان فوټبال فدراسیون ته یو لیک لیږلی او د افغانستان فوټبال فدارسیون ټولو مسئولینو، غړو او د دې ترڅنګ په غوره لیګ کي اتلي ئې لوبډلي طوفان هریرود ته د لومړي مقام مبارکي ویلې.

د افغانستان د فوټبال غوره لیګ اتم پړاو سیالۍ څه موده مخکي د ۸ بېلابیلو لوبډلو ترمنځ کابل کي ترسره سوې، چي پکښي طوفان هریرود لوبډلي لومړی مقام خپل کړ.

طوفان هریرود په دوو کلنو کي پرلپسې، خو په عموم کي ئې بیا د درېیم ځل لپاره د افغان غوره لیګ سیالۍ وګټلې.

په همدې موخه د فیفا یا د فوټبال نړیوال فدراسیون عمومي مشر جیاني اینفانتینو د افغانستان فوټبال فدراسیون مسئولینو او غړو ته په یاد لیګ کي د ښه مدیرت او ښه ترسره کولو له امله مبارکي ویلې.

هغه د افغانستان فوټبال فدراسیون مسئولینو ترڅنګ په افغان غوره لیګ کي د طوفان هریرود ته د لومړي مقام خپلولو لپاره مبارکي ویلې.

د هغه په وینا«ډېر خوشحاله یم، چي اورم په افغان غوره لیګ اتم پړاو سیالیو کي طوفان هریرود لوبډلي لومړی مقام خپأ کړی. غواړم دې لوبډلي ته د اتلولۍ په پار خپلي نیکي هیلي وړاندي کړم.

بیله شکه چي د دې لوبډلي لوبغاړو ډېري هڅي وکړې او ځان ئې اتلولۍ ته ورساوه. زه د دې ټیم روزونکي او مسئولینو ته هم مبارکي وایم او هیله لرم، چي دوی همدا لاره تعقیب کړي. په همدې موخه د فوټبال نړیوال فدراسیون د افغان فوټبال فدراسیون څخه چي د لوبغاړو ترمنځ یووالي او اتفاق ته پاملرنه کوي ملاتړ کوو».

د فوټبال نړیوال فدارسیون مشر جیاني انفانتینو په دې وروستیو کي د افغانستان فوټبال ته زیاته پاملرنه اړولې او د ستونز د حل لپاره ئې افغان فوټبال فدراسیون ته ډاډ ورکړی.

Advertisements

د لیکوال/ لیکوالې په اړه

محمد صابر حمیدي ، کندهار کې د یاران د کاري ټیم غړی

محمد صابر حمیدي په کندهار کې د یاران د کاري ټیم غړی دی. نوموړی پر دې سربیره د کندهار پوهنتون د ښووني او روزنې پوهنځی د پښتو څانګې د څلورم کال محصل دی او د ” زما“ راډیو خبري برخه کې کار کوي. صابر د فوټبال لوبغاړی دی. یاران ته په سپورټي، ټولنیزو او نورو برخو کې لیکنې او مطالب چمتو کوي. په یاران کې د نوموړي د ټولو لیکنو د بیا خپرولو حق له یاران سره خوندي دی.