خلیلزاد: غني وتښتېد، که ا.ا پر ژمنو عمل وکړي په رسمیت یې پېژنو

خلیلزاد

امریکا وایي که طالبان پر ژمنو عمل وکړي نو د دوی له لوري به په رسمیت وپېژندل شي.

د افغان سولې لپاره د امریکا د بهرنیو چارو وزارت ځانګړي استازي زلمي خلیلزاد په خپله تازه مرکه کې ویلي طالبان دمګړی د امریکا لپاره خطر نه دی او که دغه ډله پر خپلو ژمنو عمل وکړي، نو امریکا یې په رسمیت پېژني او د نړیوالو اړیکې به هم ورسره ښې شي.

هغه یو ځل بیا د کابل د ناڅاپي سقوط او دومره ګډوډیو عامل ولسمشر محمد اشرف غني بللی او په خبره یې د تېرو هوکړو پرخلاف هغه بین الافغاني خبرې ناکامې کړي او له کابل وتښتېد.

دده په خبره ټاکل شوې وه چې واک په سوله ییزه توګه ولېږدول شي، خو اشرف غني د نوي حکومت مخالف و او د سولې په ټوله پروسه کې یې خنډونه جوړول چې له امله یې افغانستان له اوسني نامعلوم برخلیک سره مخ شوی دی.

په ورته وخت کې شمالي کوریا وایي امریکا د زرګونه افغانانو د وژلو او میلیونونه نورو د کډوال کېدو مسووله ده.

د ملګرو ملتونو په عمومي مجمع کې د شمالي کوریا د پلاوي مشر د خپلو خبرو پر مهال ویلي ددې وخت دی چې ملګري ملتونه د یوه ځواکمن بنسټ په توګه پر کمزورو هېوادونو د پیاوړو هېوادونو د یرغل مخه ونیسي.

دده په خبره امریکا په تېر شل کلن ماموریت کې په افغانستان کې زرګونه کسان وژلي او ددغه هېواد د نارواوو له امله میلیونونه افغانان کډوال شوي چې د هر څه مسوولیت پر امریکا دی.

بلخوا د امریکا دیموکراتو سناتورانو په یوه لیک کې له سپینې ماڼۍ په کابل کې د وروستي هوايي برید او ملکي مرګ ژوبلې په اړه د هر اړخیزې پلټنې غوښتنه کړې ده.

د راپورونو له مخې دیموکراتو سناتورانو ویلي چې دغه ډول غیر مسوولانه بریدونه د امریکا پر وړاندې کرکه پاروي او ترهګرې ډلې پياوړې کولی شي.

سناتورانو ټینګار کړی چې باید ددغه برید په اړه هر اړخیزه پلټنه وشي او تر څنګ یې دې د خونړیو وسلو د کارولو پر تګلاره هم بیا کتنه وشي.

دوی وایي چې د بې پيلوټه الوتکو په کارونه کې تل ملکي مرګ ژوبله رامنځ ته شوې نو له همدې امله د امریکا حکومت ته په کار ده چې د بې ګناه وګړو د خوندیتوب او دغه ډول وسلو د کارونې په اړه خپله پالیسي بدله کړي.

About هوسۍ لؤنګ 873 Articles
په کابل کې د یاران خبریاله