خلیلزاد: طالبان د زور له لارې واک ته نه شي رسېدلی

خلیلزاد

د افغان سولې لپاره د امریکا خاص استازي زلمي خلیلزاد له اسوشیټېډ پرېس سره په مرکه کې هیله څرګنده کړې چې په را روان لوی اختر کې به د افغان حکومت او طالبانو ترمنځ اوربند وشي.

خلیلزاد ویلي، د امریکا او طالبانو ترمنځ د سولې له موافقې د طالبانو تعبیر دا دی چې سیاسي موافقه باید له اوربند مخکې وي او دواړه باید په یوه وخت کې اعلان شي، خو هغه وویل چې اوس مهال د اختر په ورځو کې د لنډمهال لپاره د اوربند امکان شته.

خلیلزاد ټینګار کړی چې طالبان په افغانستان کې د جګړې له لارې پوره بریا ته نه شي رسېدی او خبرداری یې ورکړ چې که له افغان حکومت سره د سولې یوې موافقې ته ونه رسېږي، نو امریکا به د طالبانو په مشرۍ د زور له لارې واک ته رسېدلی دولت په رسمیت ونه پېژني.

د یادونې ده چې طالبانو د درې میاشتني اوربند په بدل کې د خپلو ۷۰۰۰ بندیانو د خوشې کېدو غوښتنه کړې چې د حکومت په زندانونو کې بندیان دي.

د افغان حکومت د مذاکراتي پلاوي غړي نادر نادري د طالبانو دغه غوښتنه ډیره ډیره درنده بللې او ویلي، یې دي، چې دغه ډله همداشان د ملګرو ملتونو د بندیزونو له تور لېست څخه د خپلو مشرانو د نومونو حذف کېدل هم غواړي.

تر اوسه روښانه نه ده چې د افغان حکومت د طالبانو دغې غوښتنې ته څه ځواب ورکوي، خو د امریکا او طالبانو د موافقې له لاس لیک وروسته افغان حکومت د طالبانو ۵۰۰۰ بندیان خوشې کړل.

نادري ویلي، پخوا د ۵۰۰۰ طالب بندیانو خوشې کېدو نه یواځې حالات ښه نه کړل بلکې تاوتریخوالی لا زیات شو.

د درې میاشتني اوربند بحث په داسې حال کې مطرح کیږي چې د افغان ځواکونو او طالبانو ترمنځ په څو ولایتونو کې سختې جګړې روانې دي او دواړه خواوې ادعا کوي چې یو بل ته یې سخت تلفات اړولي دي.

About عاقله اسد 1244 Articles
په کابل کې د یاران خبریاله