سپورټ

حیدر اباد په شپږمې بریا لمړی مقام خپل کړ

 د هندوستان د کورني کرکټ مشهوره ۲۰ اوریزه «IPL» تجارتي سیالیو کې د سنرایزرز حیدر اباد لوبډله راجستان رایلز ته په ماتې ورکولو سره د جدول لمړۍ کرښې ته ورسیده.

 حیدر ابد لوبډلې د یولسم پړاو «IPL» ۲۰ اوریزه کرکټ سیالیو کې د دریم ځل لپاره د لوړ هدف په جوړلو کې پاتې راغله او د راجستان رایلز لوبډلې خلاف یې د لوبې په ټاکلو ۲۰ اورنو کې ۱۵۱ منډې جوړې کړې، چې پکې د افغان الراونډر محمد نبي عیسی خیل پر ځای د لمړي ځل لپاره انګلینډي اوپنر الیکس هیلز ته موقع ورکړل شوې وه.

د حیدر اباد لوبډلې لپاره په سیالۍ کې د الیکس هیلز د ۴۵ منډو ترڅنګ د لوبډلمشر کین ویلیمسن ۶۳ منډې شاملې وې.

د راجستان رایلز لوبډله د حیدر اباد خلاف په ځوابې لوبه کې هدف په رسیدو کې برلاسې نشوه او په سیالۍ کې د ۱۴۰ منډو جوړلو وروسته د ۱۱ منډو په توپیر سره ماتې وخوړه.

په دې لوبه کې افغان لوبغاړي راشد خان انګلینډی توپ وهونکی جوز بټلر په روان لیګ کې د دویم ځل لپاره د میدان څخه رخصت کړ.

حیدر اباد لوبډلې په خپلې اتمې ( ۸ ) مې سیالۍ کې د شپږمې بریا په خپلولو سره د چینايي سوپر کینګز لوبډله وروسته پریښوده او لمړي مقام ته ورسیده.

 په دغه لیګ سیالیو کې د ګډون کوونکو ۸ لوبډلو له ډلې څخه اوس سنرایزرز حیدر اباد لوبډله په لمړي، چینايي سوپر کینګز په دویم، پنجاب په دریم، کلکته نایټ رایډرز څلورم، راجستان رایلز پنځم، ممبيي انډینز شپږم، رایلز چیلینجرز بنګلور اووم او ډهلي ډریډ ویلز په وروستي اتم مقام کې ځای لري.

د لیکوال/ لیکوالې په اړه

احسان الله ساپی