سپورټ فوټبال

بارسلونا د ریال سوسیداد فوټبال ټیم سره لوبه مساوي کړه

د اسپانیا هیواد لالیګا لیګ د ۱۷مي اونۍ په لوبو کي پرون شنبه بارسلونا د ریال سوسیداد فوټبال لوبډلي سره ولوبېده، چي لوبه ۲ ګولونه په مقابل کي د ۲ ګولونو په مساوي ډول پای ته ورسېده.


د بارسلونا لپاره ګریزماین او لیویز سواریز ګولونه ولګول، خو د ریال سوسیداد لپاره بیا لومړی ګول میکل اویرزابل د پیالنټي په واسطه ګولوهنه وکړه او دوهم ګول بیا د دې ټبم لپاره الکساندر ایسک ولګاوه.


دا لوبه د ریال سوسیداد لوبډلي په کوربتوب په ریل ارینا فوټبال لوبغالي کي ترسره سوه، چي په زرګونه مینوال ځایوي او دا لوبه په زرګونه مینوالو په ژوندۍ بڼه په یاد لوبغالي کي له نژدې وکتله.

د دې لیګ په یوه بله لوبه کي تېره شپه ناوخته اتلاتیک ماډریډ ۲ ګولونه پر ۰ ایبار ته ماته ورکړه.

د اتلاتیک لپاره موراتا او سانچس ګولوهني وکړې.


بلخوا بیا د دې لیګ نوري مهمي لوبي نن یکشنبه ترسره کیږي.

د یادو لوبو له ډلي به نن ماپښین ۳:۳۰ بجې ختافه د ریال والاډولیډ سره، مازدیګر ۵:۳۰ بجې سلتاویګو د مایورکا سره، ماښام ۷:۳۰ بجې اسپانیول د ریال بیټیس سره، ماخستن ۱۱ بجې سویا د ویاریال سره او نن یکشنبه ماخستن ۱۲:۳۰ بجې بیا ریال ماډریډ د والینسیا فوټبال لوبډلي سره لوبیږي.

ها خوا راتلونکې چهارشنبه د نړۍ تر ټولو ستره د فوټبال لوبه ترسره کیږي.

دا لوبه د ریال ماډریډ او بارسلونا ټيمونو ترمنځ ده، چي د الکلاسیکو په نوم نومیږي.

ریال ماډریډ او بارسلونا به راتلونکې چهارشنبه ماخستن ۱۱:۳۰ بجې یو د بل په وړاندي سره ولوبیږي.

د دې لیګ د نمرو په جدول کي بارسلونا لومړی، ریال ماډریډ دوهم، سویا درېیم، ریال سوسیداد څلورم او ختافه بیا پنځم ځای لري.

د لیکوال/ لیکوالې په اړه

محمد صابر حمیدي ، کندهار

محمد صابر حمیدي په کندهار کې د یاران د کاري ټیم غړی دی. نوموړی پر دې سربیره د کندهار پوهنتون د ښووني او روزنې پوهنځی د پښتو څانګې د څلورم کال محصل دی او د ” زما“ راډیو خبري برخه کې کار کوي. صابر د فوټبال لوبغاړی دی. یاران ته په سپورټي، ټولنیزو او نورو برخو کې لیکنې او مطالب چمتو کوي. په یاران کې د نوموړي د ټولو لیکنو د بیا خپرولو حق له یاران سره خوندي دی.