سپورټ فوټبال

بارسلونا او ریال ماډریډ لوبډلو خپلو سیالو ټیمونو ته ماتي ورکړې.

ليکنه: صابرحمیدي

د اسپانیا هیواد لالیګا لیګ د ۱۴مي اونۍ لوبو څخه پرون بارسلونا د لګانس سره او ریال ماډریډ بیا د ریال سوسیداد فوټبال لوبډلي سره ولوبېد.

بارسلونا د لګانس فوټبال لوبډلي څخه په سختۍ لوبه ۲ ګولونه پر ۱ وګټله.

په یاده لوبه کي لومړی د لګانس لپاره د لوبي په ۱۲مه دقیقه یوسف این ناصري ګولوهنه وکړه او لومړۍ نیمایي یو ګول په مقابل کي د صفر د لګانس په ګټه پای ته ورسېده.

خو وروسته بارسلونا کلب خپلو حملو ته زور ورکړ، چي لیویز سوارز په ۵۳مه او ویدال بیا په ۷۹یمه دقیقه کي د بارسلونا لپاره ګولوهني وکړې او لګانس ټیم ته ئې دوه ګولونه پر یو ماته ورکړه.

ریال ماډریډ فوټبال لوبډلي بیا ریال سوسیداد ته ۳ ګولونه پر ۱ ماته ورکړه.

په یاده لوبه کي لومړی د ریال سوسیداد لپاره ویلین جوس د لوبي په ۲مه دقیقه ګولوهنه وکړه، خو وروسته کریم بنزما په ۳۷مه، پیډریکو والویردې په ۴۸مه او لوکا موډریچ بیا په ۷۴یمه دقیقه کي د ریال ماډریډ کلب لپاره ګولونه ولګول.

د دې لیګ په دوو نورو لوبو کي پرون شنبه ریال بیټیس د والینسیا سره او اتلاتیک ماډریډ بیا د ګراناډا ټیم سره ولوبېد، چي ریال بیټیس ۲ ګولونه پر ۱ والینسیا ته ماته ورکړه، خو اتلاتیک ماډریډ بیا لوبه یو ګول په وړاندي د یو ګول د ګراناډا سره مساوي کړه.

د اسپانیا هیواد لالیګا لیګ د نمرو په جدول کي بارسلونا د ۲۸ نمرو په درلودلو سره لومړی ځای، ریال ماډریډ هم ۲۸ نمرې لري، خو د جدول په دوهم ځای کي کرار لري. اتلاتیک ماډریډ د ۲۵ نمرو په درلودلو سره درېیم ځای، سویا د ۲۴ نمرو په درلودلو سره څلورم ځای او ریال سوسیداد بیا د ۲۳ نمرو په درلودلو سره پنځم ځای لري.

د لیکوال/ لیکوالې په اړه

محمد صابر حمیدي ، کندهار کې د یاران د کاري ټیم غړی

محمد صابر حمیدي په کندهار کې د یاران د کاري ټیم غړی دی. نوموړې پر دې سربیره د کندهار ولایت د ښوونې او روزنې د پوهنتون د پښتو څانګې د څلورم کال محصل دی او د ” زما“ راډیو خبري برخه کې کار کوي. صابر د فوټبال لوبغاړی دی. یاران ته په سپورټي، ټولنیزو او نورو برخو کې لیکنې او مطالب چمتو کوي. په یاران کې د نوموړي د ټولو لیکنو د بیا خپرولو حق له یاران سره خوندي دی.