سپورټ

افغان ۱۹ کلنو له خپل ګروپه د لومړۍ لوبډلي په توګه دوهم پړاو ته لاره پیداکړه!

ټاکل سوې وه، چي نن د افغانستان ۱۹ کلنه کرکیټ ملي لوبډلي په نړیوال جام کي خپله درېیمه او د ګروپ وروستۍ لوبه د کاناډا ۱۹ کلني ملي لوبډلي په وړاندي ترسره کړي، خو لوبه د لوند میدان له امله لغوه اعلان سوه.

د افغانستان کرکیټ بورډ وايي، دا لوبه د سویلي افریقا په پوچیسټروم ښار کي ترسره کېده، چي د پر لوبغالي باران سوی وو او د لوبغالي د لوندوالي له امله لغوه اعلان سوه او دواړو لوبډلو ته یو ـ یو امتیاز ورکړل سو.

په دې سره افغان لوبډلي د ۵ امتیازونو په خپلولو سره له ډي ګروپه د لومړۍ لوبډلي په توګه دوهم پړاو یا اتو ټیمونو ته لاره پيداکړه.

د افغانستان ۱۹ کلني ملي لوبډلي تر دې مخکي د نړیوال جام په لومړۍ لوبه کي کوربه سویلي افریقا ته او په دوهمه لوبه کي ئې بیا متحده عربي آماراتو لوبډله له ماتي سره مخ کړې وه.

تر اوسه لا نده روښانه چي افغان ټیم به په دوهم پړاو کي له کوم هیواد سره مخ سي، ځکه د یاد جام د ګروپي پړاو لوبي لا پاته دي.

د یاد جام د ګروپي پړاو سبا شنبه وروستۍ ورځ ده، چي له هغه وروسته به وتونکي ۸ ټیمونه په ډاګه سي او د دوشنبې او سې شنبې په ورځو به یو د بل په وړاندي نیمه پایلوبي ته د وتلو په موخه ولوبیږي.

د ۱۹ کلنو ترمنځ د کرکیټ نړیوال جام ۸ ورځي مخکي د ۱۶ هیوادونو ترمنځ د سویلي افریقا په کوربتوب پيل سو، چي د راتلونکي فیبروي میاشتي تر ۹مي نېټې پوري دوام کوي.

د لیکوال/ لیکوالې په اړه

محمد صابر حمیدي ، کندهار

محمد صابر حمیدي په کندهار کې د یاران د کاري ټیم غړی دی. نوموړی د کندهار پوهنتون د ښووني او روزنې پوهنځی د پښتو څانګې څخه فارغ شوی. په کندهار کې د ” زما“ راډیو سره په خبري برخه کې کار کوي. صابر د فوټبال لوبغاړی دی. یاران ته په سپورټي، ټولنیزو او نورو برخو کې لیکنې او مطالب چمتو کوي. په یاران کې د نوموړي د ټولو لیکنو د بیا خپرولو حق له یاران سره خوندي دی.

تبصره مو ولیکئ