سپورټ فوټبال

افغان ۱۹ کلنه ملي لوبډله عربستان ته ولاړه

ليکنه: صابر حميدي

د افغانستان د فوټبال ۱۹ کلنه ملي لوبډله د ۲۰۲۰م کال د آسیا اتلولۍ لوبو ته د لاري پیداکولو په موخه پرون یکشنبه عربستان هیواد ته ولاړه.

د افغانستان فوټبال فدراسیون وايي، چي د ۲۰۲۰م کال آسیا اتلولۍ لوبو ته لاري پیداکولو په موخه دا لوبي د راتلونکي نومبر میاشتي د ۶مي نېټې څخه د یادي میاشتي تر ۱۰مي نېټې پوري د عربستان هیواد په کوربتوب الخبر ښار کي ترسره کیږي.

په دې سیالیو کي د افغانستان په ګډون د آسیا د ۴۶ هیوادونو څخه لوبډلو ګډون کړی.

په یادو سیالیو کي افغان ۱۹ کلنه ملي لوبډله په شپږم ګروپ کي د عربستان، ازبکستان او هند هیوادونو سره شتون لري.

په دې سیالیو کي به افغانستان د راتلونکي نومبر میاشتي په ۵مه ۶مه نېټه د کوربه عربستان په وړاندي، د نومبر په ۸مه د ازبکستان په وړاندي او د نومبر میاشتي په ۱۰مه نېټه بیا د هند ۱۹ کلني ملي لوبډلي په وړاندي لوبیږي.

افغانستان د عربستان په وړاندي لوبه ماخستن ۸:۳۰ بجې، د ازبکستان په وړاندي ماښام ۵:۳۰ بجې او د هند په وړاندي هم لوبه ماښام ۵:۳۰ بجې ترسره پيلوي.

دا درې واړه لوبه د عربستان الخبر ښار په شهزاده سعود بن جلوي فوټبال لوبغالي کي ترسره کیږي.

د افغانستان فوټبال فدراسیون وايي افغان لوبډلي دې سیالیو ته کابل کي د تیرو دوو میاشتو راهیسي تمرینونه ترسره کړي، چي پوره چمتوالی ورته لري.

د دوی په خبره، چي افغان لوبغاړی به تر سیالو مخکي په عربستان کي هم څو ورځني تمرینونه ترسره کړي.

د لیکوال/ لیکوالې په اړه

محمد صابر حمیدي ، کندهار کې د یاران د کاري ټیم غړی

محمد صابر حمیدي په کندهار کې د یاران د کاري ټیم غړی دی. نوموړې پر دې سربیره د کندهار ولایت د ښوونې او روزنې د پوهنتون د پښتو څانګې د څلورم کال محصل دی او د ” زما“ راډیو خبري برخه کې کار کوي. صابر د فوټبال لوبغاړی دی. یاران ته په سپورټي، ټولنیزو او نورو برخو کې لیکنې او مطالب چمتو کوي. په یاران کې د نوموړي د ټولو لیکنو د بیا خپرولو حق له یاران سره خوندي دی.