افغانستان سپورټ فوټبال

افغان ښځینه فوټسال لوبډلي په درو لوبو کي ۲۲ ګولونه خوړلي!

د مرکزي آسیايي هیوادونو ترمنځ د ۱۹ کلنو لوبډلو د فوټسال سیالۍ د تاجکستان په کوربتوب رواني دي، چي افغان ۱۹ کلني فوټسال لوبډلي په کښي په درې لوبو کي ۲۲ ګولونه خوړلي او یوازي ئې یوه ګولوهنه ترسره کړې.

افغان ۱۹ کلني فوټسال لوبډلي تر دې دمه په دې سیالیو کي درې لوبي ترسره کړي دي، چي درې واړه ئې بایللي.

د ورکړل سوو معلوماتو له مخي، چي د افغانستان یادي لوبډلي خپله لومړۍ لوبه قرغزستان ته ۳ ګولونه پر ۰، په دوهمه لوبه کي ایران ته ۱۶ ګولونه پر ۱ او په خپله درېیمه لوبه کي ئې بیا پرون یکشنبه ۳ ګولونه پر ۰ د ازبکستان څخه ماته وخوړه.

ټاکل سوې افغان ۱۹ کلنه فوټسال لوبډله په یادو سیالیو کي خپله څلورمه لوبه نن دوشنبه د کوربه تاجکستان په وړاندي او خپله وروستۍ او پنځمه لوبه بیا سبا سې شنبه د ترکمنستان په وړاندي ترسره کوي.

د مرکزي آسیا د ۱۹ کلنو ښځینه فوټسال لوبډلو ترمنځ دا لیګ د تیري جمعې په ورځ پيل سو او سبا سې شنبه پای ته رسیږي.

په دې سیالیو کي افغانستان، ایران، ازبکستان، ترکمنتسان، تاجکستان او قرغزستان ۱۹ کلنو فوټسال لوبډلو ګډون کړی.

د یادو سیالیو تر ټولو مخکښ ایران دئ، خو په دوهم ځای کي ازبکستان، درېیم ځای کي قرغزستان، څلورم ځای کي ترکمنستان، پنځم ځای کي تاجکستان او شپږم او ورستي ځای کي بیا افغانستان شتون لري.

دا لوبي ټولي د لیګ په ډول ترسره کیږي، چي که هري لوبډلي ډيري بریاوي او نمرې خپلي کړي هغه هیواد د یادو سیالیو اتل پېژندل کیږي.

تر اوسه خو ایران تر ټولو مخکی دئ.

د لیکوال/ لیکوالې په اړه

محمد صابر حمیدي ، کندهار کې د یاران د کاري ټیم غړی

محمد صابر حمیدي په کندهار کې د یاران د کاري ټیم غړی دی. نوموړی پر دې سربیره د کندهار پوهنتون د ښووني او روزنې پوهنځی د پښتو څانګې د څلورم کال محصل دی او د ” زما“ راډیو خبري برخه کې کار کوي. صابر د فوټبال لوبغاړی دی. یاران ته په سپورټي، ټولنیزو او نورو برخو کې لیکنې او مطالب چمتو کوي. په یاران کې د نوموړي د ټولو لیکنو د بیا خپرولو حق له یاران سره خوندي دی.

تبصره مو ولیکئ