سپورټ فوټبال

افغان والیبال ملي لوبډلي خپله لومړۍ لوبه وبایلله

اعلان

ليکنه: صابرحميدي

د افغانستان د والیبال ملي لوبډلي په مرکزي آسیايي سیالیو کي خپله لومړۍ لوبه پرون دوشنبه د ترکمنستان والیبال ملي لوبډلي په وړاندي ترسره کړه، چي د یاد هیواد څخه ئې ۳ پر ۱ ماته وخوړه.

د ورکړل سوو معلوماتو له مخي افغانستان د ترکمنستان څخه په اول، درېیم او څلورم میدانونو کي ۳۲ پر ۳۰، ۲۶ پر ۲۴ او ۲۷ پر ۲۵ ماته وخوړه، خو یوازي ئې په دوهم میدان کي ۲۵ پر ۱۶ ترکمنستان مات کړ.

افغانستان خپله دوهمه لوبه نن سې شنبه مازدیګر د ازبکستان په وړاندي ترسره کوي.

د مرکزي اسیایي هیوادونو ترمنځ د والیبال دا لوبي پرون دوشنبه د نیپال هیواد په پلازمېنه کتماندو کي پیل سوې او تر ۶ ورځو دوام وروسته راتلونکې اونۍ پای ته رسیږي.

په دې سیالیو کي د افغانستان په ګډون نیپال، ترکمنستان، قزاقستان، ازبکستان، تاجکستان، بنګله دېش، مالدیف او بوتان هیوادونو ګډون کړی.

تر دې مخکي افغانانو په ۲۰۱۴م کال کي په مرکزي آسیایي سیالیو کي درېیم مقام خپل کړی وو.

د لیکوال/ لیکوالې په اړه

محمد صابر حمیدي ، کندهار کې د یاران د کاري ټیم غړی

محمد صابر حمیدي په کندهار کې د یاران د کاري ټیم غړی دی. نوموړې پر دې سربیره د کندهار ولایت د ښوونې او روزنې د پوهنتون د پښتو څانګې د څلورم کال محصل دی او د ” زما“ راډیو خبري برخه کې کار کوي. صابر د فوټبال لوبغاړی دی. یاران ته په سپورټي، ټولنیزو او نورو برخو کې لیکنې او مطالب چمتو کوي. په یاران کې د نوموړي د ټولو لیکنو د بیا خپرولو حق له یاران سره خوندي دی.