سپورټ وزش او تمرین

افغان لوبغاړو د موتای په نړیوالو سیالیو کي ۳ مډالونه وګټل.

ليکنه: صابرحميدي

د ځوانانو ترمنځ په تېره سپټمبر میاشت کي د موتای نړیوالي سیالۍ پيل سوي وې، چي پرون شنبه پاي ته ورسېدې او افغان لوبغاړي پکښي ښه ځلېدلي.

د مسئولینو په خبره په دې سیالیو کي د افغانستان د موتای لوبغاړو ۳ بېلابېل مډالونه خپل کړي دي.

دا مډالونه یو د سرو زرو، د سپینو زرو او بل مډال بیا د برنزو دئ، چي افغان ځوان لوبغاړو د موتای په یادو نړیوالو سیالیو کي د ښه ځلېدو له امله ترلاسه کړي.

امین الله کریمي په ۵۴ کیلو ګرام وزن کي په څلورو لوبو کي درې وګټلې او یوه ئې بیا وبایللې، چي په دې سره ئې د برنزو مډال وګاټه.

کریمي د الجزایر، بریتانیا او د فرانسې لوبغاړو ته ماته ورکړه، خو د بلجیمي تکړه سیال څخه ئې بیا ماته وخوړه.

همدا امین الله کریمي د موتای په بله څانګه موی تاله کي((د اوبو پر سر لوبه)) کي هم لوبي ترسره کړې، چي په یاده څانګه کي ئې بیا د سرو زرو مډال ترلاسه کړ.

په دې څانګه کي بیا کریمي دوې لوبي ترسره کړې، چي په لومړۍ لوبه کي ئې پولنډي او دوهمه لوبه کي ئې بیا د پرو هیواد لوبغاړي ته ماته ورکړه او د سرو زرو مډال وګاټه.

بل ځوان افغان لوبغاړي فرهاد حسیني بیا په ۵۷ کیلو ګرام وزن کي مغولستاني او کلمبیايي سیال ته ماته ورکړه او په نیمه پایلوبه کي ئې بیا د روسیې هیواد لوبغاړي څخه ماته وخوړه او کوم مډال ئې نکړ ترلاسه.

خو حسیني د موی تاله په څانګه کي سریلانکا او اسرائیل ته ماته ورکړه او د فیلیپين څخه ئې ماته وخوړه، چي په دې سره ئې د سپينو زرو مډال خپل کړ.

د یادولو وړ ده، چي د ځوانانو ترمنځ د موتای دا نړیوالي لوبي د تیري سپټمبر میاشتي په ۲۸مه نېټه د ترکیې په انتالیا ښار کي پيل سوي وې، چي پرون یکشنبه پاي ته ورسېدې.

په دې سیالیو کي د ۷۲ هیوادونو څخه د موتای ځوانو لوبغاړو ګډون کړی وو.

د لیکوال/ لیکوالې په اړه

محمد صابر حمیدي ، کندهار کې د یاران د کاري ټیم غړی

محمد صابر حمیدي په کندهار کې د یاران د کاري ټیم غړی دی. نوموړې پر دې سربیره د کندهار ولایت د ښوونې او روزنې د پوهنتون د پښتو څانګې د څلورم کال محصل دی او د ” زما“ راډیو خبري برخه کې کار کوي. صابر د فوټبال لوبغاړی دی. یاران ته په سپورټي، ټولنیزو او نورو برخو کې لیکنې او مطالب چمتو کوي. په یاران کې د نوموړي د ټولو لیکنو د بیا خپرولو حق له یاران سره خوندي دی.