Advertisements
رسنۍ

افغان فوټبال لوبډلي د قطر څخه ماته وخوړه.

ليکنه: صابر حميدي

د افغانستان فوټبال ملي لوبډله د سې شنبه په ماښام د قطر هیواد فوټبال ملي لوبډلي سره ولوبېده، چي قطر ملي ټیم د پینالټۍ په واسطه افغان لوبډلي ته یو ګول وواهه او بریا ئې خپله کړه.

دا لوبه د افغانستان په کوربتوب تاجکستان هیواد په دوشنبې ښار کي ترسره سوه.

د تیرو لوبو خلاف افغان فوټبال لوبډلي تیره شپه د قطر په وړاندي خورا ښه لوبه ترسره او په یوه ګول ئې د یاد هیواد څخه ماته وخوړه.

د یادي لوبي په لومړۍ نیمایي کي د قطر په وړاندي پینالټي راووتله، خو د قطر لوبډلي ګول ساتونکي د افغان لوبغاړي عمران حیدري څخه پینالټي راوګرځول او په ګول نسوه بدله.

خو د لوبي په دوهمه نیمایي کي بیا پر افغانستان پینالټي راووتله او د قطر لوبغاړي په ګول بدله کړه.

دا لوبه د ۲۰۲۲م کال د فوټبال نړیوال جام او د ۲۰۲۳م کال د آسیا ملتونو جام ته د لاري پيداکولو په موخه ترسره سوه، چي په دې سیالیو کي دا د افغانستان پنځمه لوبه وه.

د ۲۰۲۲م کال د فوټبال نړیوال جام او د ۲۰۲۳م کال د آسیا ملتونو جام ته د لاري پيداکولو په موخه افغان لوبډلي یوار مخکي هم د قطر هیواد سره مخ سوی وو، چي قطر ۶ ګولونه پر ۰ افغانستان ته ماته ورکړه. په دوهمه لوبه کي افغانانو بنګله دېش ته ۱ ګول پر ۰ ماته ورکړه، خو په درېیمه لوبه کي ئې بیا د عُمان څخه ۳ ګولونه پر ۰ ماته ورکړه.

افغان لوبډلي خپله پنځمه لوبه کي تېره شنبه یو ګول په مقابل کي د یو ګول لوبه د هند سره مساوي کړه.

افغان فوټبال لوبډله د دې سیالیو په ۵ ګروپ کي د قطر، بنګله دېش، عمان او هند لوبډلي سره شتون لري.

په یاد ګروپ کي قطر لومړی، عمان دوهم، افغانستان درېیم، هند څلورم او بنګله دېش بیا پنځم ځای لري.

Advertisements

د لیکوال/ لیکوالې په اړه

محمد صابر حمیدي ، کندهار کې د یاران د کاري ټیم غړی

محمد صابر حمیدي په کندهار کې د یاران د کاري ټیم غړی دی. نوموړی پر دې سربیره د کندهار پوهنتون د ښووني او روزنې پوهنځی د پښتو څانګې د څلورم کال محصل دی او د ” زما“ راډیو خبري برخه کې کار کوي. صابر د فوټبال لوبغاړی دی. یاران ته په سپورټي، ټولنیزو او نورو برخو کې لیکنې او مطالب چمتو کوي. په یاران کې د نوموړي د ټولو لیکنو د بیا خپرولو حق له یاران سره خوندي دی.